Armata është e gatshme me çdo kusht të mbrojë integritetin territorial dhe pavarësinë e Republikës së Maqedonisë, ka deklaruar presidenti i Maqedonisë dhe komandanti suprem i forcave të armatosura, Gjorge Ivanov në solemnitetin e 25 vjetorit nga marrja e Karakolit “Ramna Niva” nga pjesëtarët e ARM-së dhe ngritjen e flamurit të Republikës së Maqedonisë në kufirin shtetëror.
Edhe sot, sikur edhe para një çerek shekulli, po ballafaqohemi me sfida. Por edhe sot sikur para çerek shekulli, e kemi Armatën e Republikës së Maqedonisë e cila është mbrojtëse nga kërcënimet, krenari për qytetarët dhe shpresë për paqe në vend. Armata ka dhënë kontributin më të madh për plotësimin e standardeve të larta në fushën e mbrojtjes, ndërsa kjo u dëshmua edhe me menaxhimin e suksesshëm dhe profesional, por me kërcënimin nga migrimi ilegal në kufirin tonë jugor, – ka deklaruar Ivanov.
Ndërkohë, Kryetari i VMRO DPMNE-së, Nikolla Gruevski në një intervistë për Telegrafin e Serbisë tha se populli maqedon nuk do të tërhiqet. Ai e vlerëson gjendjen në vend lidhur me krizën qeveritare, si tensionuese dhe të paqartë.
Është të vështirë të parashikohet tjetër pos protestave, kur veproni në kundërshtim me vullnetin e qytetarëve”, – ka deklaruar Gruevski.
Gruevski ka akuzuar liderin opozitar, Zoran Zaev, dhe siç ka thënë ai, Zaev ka një skenar për ridefinimin e plotë të shtetit dhe ndryshimin e konceptit të saj.
Në pyetjen nëse gjendja në Maqedoni mund të përkeqësohet Gruevski tha se mllefi i popullit është i madh.
