Fatmir Xhafaj, ka reaguar për herë të parë, pas njoftimit të kryeministrit Rama se ai ka dhënë dorëheqjen. Xhafaj nuk ka dhënë asnjë shpjegim për largimin nga detyra, por ka thënë se ka paraqitur dorëheqjen me vullnetin e tij.
Largimi i Xhafajt, ka shkaktuar furtunë në rradhët e mazhorancës. Një pjesë e opozitës, ka aluduar se largimi i Xhafajt, lidhet me operacionin e fundit “Vol-vo4” dhe lidhjet e Vangjush Dakos me bandën e Shijakut. Për këtë çështje, mund të ketë patur pëplasje mes ministrit i cili ka dashur që operacioni të shtrihet në nivele më teë larta dhe kryeministrit Edi Rama.
Mesazhi i ministrit Xhafaj pas dorëheqjes nga detyra:
Pas më shumë se 1 viti në krye të Ministrisë së Brendshme, me vullnetin tim, i kam paraqitur Kryeministrit Edi Rama dorëheqjen time si Ministër i Brendshëm, duke e falënderuar për besimin e dhënë me emërimin në këtë detyrë të rëndësishme.
Erdha në këtë detyrë për një mision të vështirë, shërbeva me pasion, me modesti dhe me devotshmëri në shërbim të shtetit, të ligjit dhe të qytetarëve.
Sfidat kanë qenë tepër të mëdha, por jam krenar se në krye të një ekipi me integritet e përkushtim në Ministrinë e Brendshme dhe Policinë e Shtetit, kemi mundur të arrijmë suksese shumë të rëndësishme në forcimin e rendit dhe sigurisë në vend, disa prej tyre të konsideruara të pamundura për vite të tëra.
Falënderoj të gjithë ekipin, kolegët, miqtë e mi dhe veçanërisht familjen time, si dhe të gjithë ata që më vlerësuan, besuan dhe më mbështetën gjatë gjithë kësaj periudhe.
Vlerësim dhe mirënjohje nga zemra për të gjithë ata gra dhe burra në uniformë, për gjithçka bënë gjatë kësaj periudhe në luftë me krimin dhe paligjshmërinë.
Një falënderim i veçantë edhe për partnerët vendas dhe ata të huaj, agjencitë ligj zbatuese vendase e ndërkombëtare, mbështetja e të cilëve ka qenë një inkurajim shumë i rëndësishëm.
