Një Monedhë e vockël, qesharake,
me qiellin, malin, detin
bënte llafe:
“Në të gjithë botën ‘e lavdishme’
unë jam gjëja më e rëndësishme:
Blej e shes dhe kthej përmbys dynjanë.
Dorëzohuni pa kushte, o mjeranë!”
Heshtje.
Rrokulliset tej Monedha trime,
me gjet vendin ku pëlqejnë fjalimet…
Turma
Buajt kanë mbuluar krejt savanën!
Dielli djeg; bari me pakicë.
Tigrat aty rrotull thurrin plane,
për ndonjë gosti pa sakrifica.
Befas ata hidhen mbi një Buall
dhe e shqyejnë me egërsi e ngut.
Turma atje tej rri si e huaj;
nuk e dinë; i vjen radha gjithkujt…
Dordolec
Në arën ku Gallofët bëjnë festë,
po mban fjalim edhe një Dordolec:
“I shihni këto fusha, rreth e qark?
Janë në mbrojtjen time; pa merak!”
Po kur Moti dhëmbët i nxjerr jashtë,
shkalafitet trimi kokëkashtë;
bëhet fije-fije, e merr era,
bashkë me fjalime dhe idera…
