Me kureshtjen nis rruga e diturisë
për një mendjendritur
kurioziteti është cilësi e parë
që na nxit gjithmonë,
me veten dhe të tjerët të jemi në garë
Ajo shfaqet heret në moshën
e fëmijërisë
dhe na shoqëron
deri në fund të pleqërisë.
Dituria pa urtësi është e verbër
mençuria pa inteligjencë
ngjan si e çmendur
Etja për dituri
është si paraja që lakmon
sa më shumë të kesh, të tjera kërkon
Kur shtohet dituria, rritet fuqia
drita e mendjes sjell paqë e siguri
nuk mund të jesh i lirë pa maturi
Liria është një frut që piqet ngadalë
për të duhet luftuar, askush nuk ta falë
Liria ka gjithmonë tendencë teprimi
dhe kjo është nëna e çdo shkatërrimi
Gjithnjë ec me plane e qëllime në jetë
mos bridh pas dëshirave pa fré e bereqet
sepse kush argëtohet me jetën
kurrë nuk arrin sukses
të sjellurit kot kthehet në ves
Suksesi vjen tek ai që e kërkon
kush ka vetëm dëshira, jeta e ndëshkon
Planet janë ëndrra të njerëzve të ditur
me vullnet e disiplinë arrihet suksesi i pritur
Kush nuk kultivon zakonin e të menduarit
humb kënaqësinë e të jetuarit
Fli me një ëndërr, zgjohu me një qëllim
Mos lejo ta tregojnë rrugën
ata që e kanë humbur
në çdo shtegëtim
Një rrugë e re nis me ty
kur je i pari, duke e shkelur
Kështu lihen gjurmët
që vlejnë për çdo brez tjetër
Dija është çelësi që hap derën e lirisë
vuajtja dhe dyshimi janë origjina e urtësisë
Vetëm urtësia na bën të lirë
zbukuron jetën e bën më të mirë
Dija që nuk aplikohet, nuk ka asnjë vlerë
ajo nuk blihet as dhurohet ndonjëherë
Sado i sigurtë të jesh në mendime
shfaqi ato me pak dyshime
Guximi është kushti i parë i përparimit
ai ka gjenialitet, pushtet e magji
jeta merr kuptim përmes ndryshimit
po i vure në jetë, ti je gjeni.
Mendohu thellë, vëzhgo me vëmendje
ji i gatshëm të mësosh përherë
vëre në jetë të mirën tënde
sepse vetes dhe të tjerëve ju bën nderë
Edhe nga i padituri diçka mëson
E nëse guxon të mësosh të tjerë në jetë
Kurrë mos pusho së mësuari vetë.
