Nga letërkëmbimi me miqtë e tij arbëreshë , poetë dhe jo vetëm , letrat e Poetit Vorea Ujko drejtuar Dritëroit , janë më të bukurat. Njëra prej tyre është e vjeshtës së vitit 1981 , botuar edhe në librin “ Liriku i tokës , demoni i fjalës “ . Moikom Zeqo …
“ I dashur Dritëro
Unë e ndiej largësinë nga ju. Jam gjithmonë i detyrueshëm për mikpritjen vëllazërore dhe nuk di si t’ia shpërblej mëmës Shqipëri ! Po unë e di se ti je i kënaqur kur unë i shërbej Atdheut . Unë jam poet si edhe Ti je poet . Po, je poet . Kam rilexuar në këto ditë “ Nënë Shqipëri “ e më qan shpirti dhe m’u mbush me gëzim.
Ajo është historia gjeologjike panoramike , legjendare , heroike , filozofike , kombëtare , politike , shoqërore , popullore e gjithë Shqipërisë .
E ti askurrë s’je spektator, por jeton me çdo çast të kësaj historie , je i ngatërruar me çdo ngjarje dhe mishëron në vjershat dashurinë për atdheun, ndjenjat e dëshirat e njeriut shqiptar . E gjithçka janë mish e gjak . Sa padrejtësi , sa trimëri , sa gjak ! Ti je plot nerva , zemër e tru . Je i rreptë dhe i butë , krenar e i përvuajtur , i përflaktë e i akullt , serioz e sarkastik , i trishtuar dhe i gëzuar . Nëse isha një romantik do të thoja : ëngjëll e demon .
Me ty Shqipëria bëhet Zemra e botës .
Mes dy malesh me dëborë
ra një trim vetullhollë.
O ju korba, mos më ngani!
Sytë e zez ju mos m’i hani .
Sigurisht ashtu këndonte De Rada e kjo është një rapsodi e shkëlqyeshme arbëreshe .
Cila letërsi vallë e ka këtë perlë?
E tashi si kritik do të doja që Dritëroi ta shprehte vëmendjen, që askurrë s’është skeptike , por përherë serioze dhe e angazhuar rreth temave të njeriut e të jetës , rreth temave të Lorkës , Pastërnakut , Nerudës , Kuasimodos , Momals etj . Do të ishte një ndërprerje mes luftës , pushimi i luftëtarit . Jam i bindur se do të fitosh Çmimin Nobel . Ndryshe , i vë zjarr Suedisë.
Të falënderoj nga zemra për dhuratën e veprave të tua . Tani jam duke shkruar një kritikë mbi Dritëro Agollin , por nuk e harroj poezinë. Akoma nuk e kam lexuar as te Drita as te Mësuesi poezinë që të kam kushtuar . Pse? Vallë ajo s’të pëlqeu ?
Tuk – tuk ! Hape! Jam unë! As kamerad as tavarish , Hape ! Jam Voreo Ujko e zemrën e kam të bardhë . Bëjani qeifin poetit .
“ Drita” kërkon përshtypjet e mia për vendin tonë . Le t’i shkruajnë të huajt . Për mua Shqipëria është mëma e nuk shkruhen mbresa mbi mëmën. Mëma këndohet . Ti më kupton .
Asgjë akoma nga vëllezërit Kosovarë. Unë i kam shkruar Esadit , por nuk kam pasur përgjigje . Falënderime për Llazar Siliqin që shkruan bukur mbi arbëreshët .
Të fala të përzemërta Vehbiut , Fatmirit , Ismailit , Fatosit , Aleksit , partizanit Andrea , Spahiut , Fehmi Ibrahimit , Bardhylit , Nasho Jorgaqit , L.Qafëzesit etj .
Urime për shëndetin e Shevqet Musarajt .
Kur do të takohemi ? Qofsh i lumtur me familjen !
Vorea
