Sigal

Britaniku Luis Hamilton ka fituar çmimin e madh të Japonisë, duke u konfirmuar si piloti më i fortë i kampionatit automobilistik.  Fitorja e nëntë sezonale dhe e katërta radhazi, e shkëputi pilotin e Mercedezit me 67 pikë më shumë se rivali i tij Vetel, duke i dhënë mundësinë atij, që të shpallet kampion, për herë të pestë, që në garën e ardhshme në Austin.

Fitorja në garën e Suzuka-s nuk u vu në asnjë moment në dyshim nga Hamilton, i cili e nisi garën në vendin e parë dhe e përfundoi po në krye. Britaniku u ndihmua edhe nga fundjava “e zezë” e Vetel, i cili e nisi garën në vendin e 9, pas problemeve që pati në provat zyrtare të së shtunës. Piloti i Ferrarit edhe pse e startoi mjaft mirë, duke fituar disa pozicione deri tek vendi i 4, u detyrua të kënaqej me vendin e 6, pas një kontakti me pilotin e Red Bull, Vershtapen, që e çoi Vetelin për disa çaste në vendin e parafundit.

Në podium u ngjit edhe piloti tjetër i Mercedezit, Valteri Botas, i cili nuk u shfaq aspak agresiv ndaj shokut të skuadrës duke u mjaftuar me vendin e dytë. Në vend të tretë u rendit Max Vershtapen i ndjekur nga Red Bulli tjetër i Daniel Riçardos. Vetëm vendi i pestë për ferraristin, Kimi Raikonen.

Rezultati i garws

  1. Hamilton 25 Pikë
  2. Bottas 18 Pikë
  3. Verstappen 15 Pikë
  4. Ricciardo 12 Pikë
  5. Raikkonen 10 Pikë
  6. Vettel 8 Pikë
  7. Perez 6 Pikë
  8. Grosjean 4 Pikë
  9. Ocon 2 Pikë
  10. Sainz 1 Pikë

Klasifikimi

  1. Lewis Hamilton Mercedes 331
  2. Sebastian Vettel Ferrari   264
  3. Valtteri Bottas Mercedes  207
  4. Kimi Räikkönen Ferrari    196
  5. Max Verstappen Red Bull 173
  6. Daniel Ricciardo Red Bull  146
  7. Sergio Pérez Force India    53
  8. Nico Hülkenberg Renault    53
  9. Kevin Magnussen Haas      53
  10. Fernando Alonso McLaren  50