INTERVISTA/ Ndeshjet në Europë dhe starti i sezonit të ri, në këndvështrimin e specialistit të futbollit Artur Lekbello
Agron KAJA
Futbolli shqiptar është i përqëndruar në fazën përgatitore dhe ndeshjet në Europë, si e përshkruani këtë situatë?
Me ndryshimin e skemës së kampionatit, do ketë më shumë rivalitet. Përgatitjet janë zhvilluar ritmikisht pasi do ikin nga “Final 4” i famshëm. Të gjitha skuadrat janë përforcuar, me Egnatian dhe Dinamon që kanë bërë lëvizje më të goditura.
Egnatia dhe Dinamo kanë shkruar historinë në Europë, cilat i veçoni si dukuritë më të spikatura të këtij suksesi?
Të dyja skuadrat janë përforcuar me elementë cilësorë, të cilët edhe e kanë ngritur edhe cilësinë e lojës. Ndaj unë mendoj se është meritë edhe e trajnerëve me skemat që kanë përdorur në fushë, duke i përshtatur vlerat më të mira të lojtarëve.
Mendoni se të dyja skuadrat tona do ta kenë mundësinë që të kalojnë edhe në turin e Play-off-it?
Rruga është e hapur për të dyja skuadrat. Shanci i Dinamos është më afër, pavarësisht se Pafos ka luajtur edhe në grupe. Janë 50 me 50, por do e kalojë, njëherësh edhe Egnatia ka të njëjtat kuota, pasi luan sezonin dhe ngre financat.
Abissnet Superiore nis rrugëtimin në kampionatin e 88-të, si e parashikoni startin në javën e parë?
Në këtë javë të parë spikasin Egnatia-Tirana dhe Partizani-Teuta. Të gjitha skuadrat kanë bërë ndryshime e përforcime, ku Skënderbeu edhe mund ta marrë barazimin në Shkodër. Do kemi një Elbasan me vështirësi në Laç, por mund ta surprizojë.
Java e parë do të luhet e shtrirë në tre ditë, do ketë ndikim te skuadrat kjo shtrirje e tillë?
Absolutisht që nuk ka ndikim negativ. Përkundrazi, sepse të gjitha skuadrat e kanë patur kohën rikuperuese të plotë për takimin e radhës. Deri në këtë start, ato kanë mundësi të vogla rikuperimi, por edhe të ndonjë skeme që tu vlejë për garën.
Nisur nga kalendari i javës së parë të Superiores, cilat skuadrat i parashikoni si fituese në transfertë?
Shikoj Teutën dhe Tiranën si pozitive në transfertë, ndoshta edhe Skënderbeun me Elbasanin. Fillimi i kampionatit është delikat, pasi aty shikohet se çfarë punë është bërë dhe paraqitja e elementëve përforcues. Surprizat do jenë prezente këtë javë.
Në skemën e re edhe kalendari ka pësuar ndryshim, do ketë efekte pozitive në treguesit e lojës?
Me gjashtë vëndet e para sipas skemës së re, do jetë një luftë më e fortë, pasi ka më shumë hapësira për ekipet. Unë jam partizan për një Superiore me 12 ekipe, një kampionat që përfundon pa skema të tilla. Java e parë, e vështirë për parashikimet.
Cili është urimi juaj për këtë start të ri të kampionatit të 88-të të Abissnet Superiore 2026-2027?
Unë do uroja mbarësi në një kampionat të qetë e Fayr-Play, me gjykime më të drejta, jo si në sezonin e kaluar që kishte problem me gjykimet dhe VAR-in. Ky do jetë një rrugëtim ku të gjitha skuadrat do të bëjnë më të mirën e tyre. Ju uroj sukses.
Në turin tjetër, Egnatia do shtegëtojë jashtë Rrogozhinës
Kudo që të luajë Egnatia pas dy sfidave me Lillestrom të Norvegjisë, e sigurtë është se ndeshjet nuk do të luajë në stadiumin e saj “Arena Egnatia”. Kjo, pasi impianti në Rrogozhinë nuk plotëson kushtet e UEFA-s sa i përket zhvillimit të ndeshjeve në fazën në grupe. Këdhtu, Egnatia do të shtegtojë në një nga stadiumet e tjera që plotësojnë kushtet e UEFA-s, në “Elbasan Arena” apo në “Air Albania”.
SKUADRAT NË EUROPË
SEZONI 2026-2027
E G N A T I A
LIGA E KAMPIONEVE
Turi i parë eliminator
E mërkurë, 8 korrik 2026
Petrokub (Mda)-Egnatia 1-1
E mërkurë, 15 korrik 2026
Egnatia-Petrokub (Mda) 6-1
Turi i dytë eliminator
E mërkurë, 22 korrik 2026
Egnatia-Celje (Sllo) 3-3
E martë, 28 korrik 2026
Celje (Sllo)-Egnatia 2-2
Egnatia eliminohet me penallti
UEFA EUROPA LIGË
Turi i tretë eliminator
E martë, 4 gusht 2026
Shmarok R (Irl)-Egnatia 3-1
E enjte, 13 gusht 2026
Egnatia-Shmarok R (Irl) 5-1
Kualifikohet Faza Play-off
E enjte, 20 gusht 2026
Egnatia-Lilestron (Nor) 19:00
(Arbitër: Vili Delayod-Francë)
DINAMO CITY
KONFERENCË LIGË
Turi i parë eliminator
E enjte, 9 korrik 2026
Dinamo C-Astana (Kaz) 0-1
E enjte, 16 korrik 2026
Astana (Kaz)-Dinamo C 1-4
Dinamo kalon turin tjetër
Turi i dytë eliminator
E enjte, 23 korrik 2026
Aluminij (Sllo)-Dinamo 1-1
E enjte, 30 korrik 2026
Dinamo-Aluminij (Sllo) 3-0
Turi i tretë eliminator
E martë, 4 gusht 2026
Auda (Let)-Dinamo C 1-0
E enjte, 13 gusht 2026
Dinamo C-Auda (Let) 4-0
Kualifikohet Faza Play-off
E enjte, 20 gusht 2026
Dinamo C-Pafos (Cyp) 21:00
(Arbitër: Laurenc Visser, Belg)
Përforcime dhe lajme të mira, Dinamo gati përballë qipriotëve
Ndeshja e parë e Dinamos në Play-off të Konferencë Ligë do të luhet të enjten përballë Pafos të Qipros, në orën 21:00 në “Elbasan Arena”. Për këtë përballje, trajneri sheh që grupi i lojtarëve po konsolidohet, ndërsa rikthimi i Ibrahim Mustafa, por edhe qëndrimi i Goudiaby, e çliron stafin teknik, i cili mendon se duhen ende lëvizje në merkato. Sezoni është i gjatë dhe përforcimi me një mbrojtës dhe një mesfushor me lojtarë cilësorë, do i përshtaten skemës për harmonizimin e skuadrës. Dinamo synon grupet në Konferencë Ligë, njëherësh edhe trofetë e sezonit në futbollin shqiptar. Dje në mbrëmje, Dinamo do prezantonte dy afrime të reja, mesfushorin Alhassan dhe sulmuesin Almir Ajzeraj, por e anuloi për arsye shëndetësore!
