Alarmi/ Urdhri i Farmacistëve të Shqipërisë, apel farmacive dhe depove, të heqin nga raftet shurupin “Ponstan” 50mg.ml” për shkak të përqindjes së lartë të Plumbit dhe Lithiumit, të cilët shkaktojnë sëmundje kanceroze dhe tjetërsojnë ADN-në e njeriut. Thirrje për qytetarët të mos i blejnë dhe për institucionet e kontrollit. Ja rastet skandaloze
Pse nuk vihen përpara përgjegjësisë Qendra e Regjistrimit të Barnave, që e kishte lejuar?A ka të tjera ilaçe, që nuk plotësojnë standardet e BE-së, por tregtohen
Shurupi “Ponstan 50 mg.ml” me përqindje të lartë Plumb dhe Lithium tregtohej, duke vrarë pacientët
Jakup B. GJOÇA
Para disa ditësh, Urdhri i Farmacistëve të Shqipërisë bëri me dije, se shurupi “Ponstan 50 mg/ml” duhet të hiqet nga tregu, sepse përmban përqindje të lartë Plumbi dhe Lithiumi, elementë kimikë shumë të rrezikshëm për shëndetin e njeriut. Deri tani, Qendra e Regjistrimit të Barnave ka heshtur dhe nuk ka reaguar.
Përgjegjësia penale e QRB-së
Në Shqipëri, çdo ilaç, medikament që importohet, fillimisht u nënshtrohet të gjitha analizave nga Qendra e Regjistrimit të Barnave. Kur këto analiza janë konform standardeve të lejuara të Bashkimit Evropian, atëherë, lejohet të tregtohet ilaçi dhe medikamenti që hyn në Shqipëri. Shurupi “Ponstan 50 mg/ml”, natyrisht që u është nënshtruar analizave nga QRB-ja. Atëherë, derisa Urdhri i Farmacistëve të Shqipërisë jep alarmin dhe kërkon që ky medikament të hiqet nga raftet e farmacive, sepse është shumë i rrezikshëm për shëndetin e njerëzve, ngaqë përmban elementë shumë të rrezikshëm, sikurse Plumb dhe Lithium, të cilët shkaktojnë kancer dhe ndikojnë në tjetërsimin edhe të ADN-së së njeriut, atëherë pyetjet që kërkojnë përgjigje janë:
- Kur është regjistruar për herë të parë shurupi i Ponstanit, që tani duhet të hiqet nga tregu?
- Kush i ka bërë ato analiza?
- Atëherë analizat kanë qenë në rregull dhe shurupi është tjetërsuar më vonë?
- Cila kompani e importon?
- Nga importohet ky shurup?
- Po në vendet e Bashkimit Evropian, përse nuk ka të tillë alarm?
- Mos vallë ky shurup me përmbajtje të lartë Plumbi dhe Lithiumi, prodhohet vetëm për vendet e treta, sikurse Shqipëria, ku nuk kërkohen standardet e Bashkimit Evropian?
- A mundet që këtyre pyetjeve, por edhe të tjera, Qendra e Regjistrimit të Barnave t’u japë shpjegime?
- Përse deri tani prokuroria hesht dhe nuk heton, kompaninë që e ka importuar shurupin “Ponstan 50 mg.ml” dhe vetë QRB-në që e ka lejuar të tregtohet?
- Sa kohë ka ky shurup Ponstan 50 mg/ml që tregtohet në Shqipëri?
Alarmi i Urdhrit të Farmacistëve të Shqipërisë për shurupin “Ponstan 50 mg/ml”
Më datë 02.05.2019, me anë të shkresës Nr. 2290/3, datë 30.04.2019, Agjencia Kombëtare e Barnave dhe Pajisjeve Mjekësore na bën me dije për tërheqjen e barit “Ponstan shurup 50 mg/ml”, nga MAH (prodhuesi) dhe distributor farmaceutik, të cilët importojnë këtë bar, si pasojë e tejkalimit të niveleve të ekspozimit ditor të lejuar për Plumb dhe Lithium. Agjencia nëpërmjet strukturave të saj do të nisë kontrollet në subjektet farmaceutike dhe në rast të konstatimit të tregtimit të “Ponstan shurup 50 mg/ml”, do të marrë masa në zbatim të legjislacionit në fuqi në Republikën e Shqipërisë.
Specialisti Pipero: Në Shqipëri po përdoret medikamenti që dëmton kodin gjenetik të njeriut!
Medikamenti për shpendët “dimetridazol” futet në vendin tonë në rrugë të paligjshme. Burime thonë se një kilogram “dimetridazol” kushton 70 euro në treg. Kështu, farmacisti mendon për tregtinë e tij, ndërsa fermeri për shëndetin e pulave. Por, fatkeqësisht askush nuk mendon për efektet, që ky ilaç i ndaluar jep te konsumatori.
Specialisti Pëllumb Pipero: Efekt kancerogjen
“Pashë me shumë vëmendje dëmet potenciale, ku në radhë të parë ishin ato mbi gratë shtatzëna. Pra, ka efekte të thella teratogjene, që do të thotë dëmtime të shëndetit të fëmijës në barkun e nënës. Mund të shoqërohen me anomali fizike, mendore, apo dhe aborte të parakohshme të fëmijës. Një tjetër efekt anësor mjaft i rëndë është efekti kancerogjen, veçanërisht në traktin riprodhues dhe ushqyes të nënës me gji, por edhe në organe e inde të tjera të organizmit”, tha Pëllumb Pipero, mjek infeksionist.
Sipas mjekëve, “dimetridazoli” mund të deformojë kodin gjenetik të njeriut. “Një efekt tjetër i rëndë anësor janë ndryshimet kromozomike. Nëse ne konsumojmë mishin apo vezën për disa vite dhe nuk ndiejmë efekte anësore në trupin tonë, duhet të jemi të sigurt që ndryshimet e rënda gjenetike do t’i pësojnë fëmijët tanë. Ky është efekt i pariparueshëm”, tha më tej Pëllumb Pipero. Është trupa inspektuese e Drejtorive Rajonale Bujqësore, ajo që duhet të monitorojë farmacitë veterinare. Por, me sa duket, një gjë e tillë nuk ndodh.
“Mali” i ilaçeve të skaduara në QSUT shkakton kosto të shumëfishta
Të dhënat tregojnë, se rreth 93 për qind e medikamenteve që gjenden në farmacinë qendrore të QSUT-së janë të skaduara. Dëm, i cili u akumulua vit pas viti në 447 milionë lekë, ndërkohë që qindra pacientë vuajtën pasojat e mungesës së barnave. Mungesa e medikamenteve mjekësore është një ndër shqetësimet kryesore të qindra pacientëve dhe familjarëve të tyre dhe një “gangrenë” e vazhdueshme e sistemit shëndetësor në Shqipëri përgjatë dy dekadave të fundit. Megjithatë, “një mal” me ilaçe të skaduara u ngrit vit pas viti në farmacinë qendrore të Qendrës Spitalore Universitare “Nënë Tereza” në Tiranë, ndërkohë që të sëmurët po vuanin pasojat e mungesave të tyre. BIRN siguroi një raport inventari të medikamenteve që gjendeshin në farmacinë qendrore të QSUT-së deri, më 9 maj 2018 dhe i përpunoi të dhënat, pasi i hodhi ato në një databazë. Analiza e përftuar tregon se rreth 93 për qind e ilaçeve në farmacinë qendrore janë të skaduara dhe vetëm 7 për qind e tyre ishin ende të përdorshme për pacientët. Medikamentet që gjenden në QSUT u përkasin viteve 2012-2018 dhe kapin një kosto totale kontabël prej 481.8 milionë lekësh [rreth 3.9 milionë euro]. Nga këto, ilaçe me vlerë kontabël 447 milionë lekë rezultojnë të skaduara dhe vetëm 34.7 milionë brenda afatit të përdorimit. Grumbullimi i stokut të madh të ilaçeve të skaduara në farmacinë qendrore të QSUT është konsideruar një problem serioz edhe nga Kontrolli i Lartë i Shtetit, KLSH. Në dy raporte auditi për vitet 2014 dhe 2015, KLSH konstatoi se kishin shkuar dëm tonelata medikamentesh të tenderuara apo të dhuruara në Qendrën Spitalore Universitare dhe fajësonte për këtë keqmenaxhimin, por edhe praktikën e tenderimit të medikamenteve në prag të datës së tyre të skadencës.
Ilaçet e skaduara
Të dhënat tregojnë se pjesa më e madhe e barnave të çuara dëm në farmacinë qendrore të QSUT-së trajtonin sëmundje mjaft të përhapura në Shqipëri, të tilla si sëmundjet kardiovaskulare, ato psikike apo antibiotikë për trajtimin e një sërë infeksionesh bakteriale. Rreth 60 për qind e tyre rezultojnë të jenë blerë në vitet 2011-2013 dhe kanë dalë jashtë përdorimit në vitet 2014 dhe 2015. Pjesa tjetër rezulton të ketë skaduar gjatë viteve 2016-2018. Në raportin e auditimit të publikuar ,në mars 2016, Kontrolli i Lartë i Shtetit evidentonte faktin se situata në vitet 2014-2015 paraqitej tejet e rënduar me rreth 520 mijë medikamente të skaduara. Thuajse gjysma e sasisë, sipas KLSH-së ishin tenderuar me paratë e buxhetit të shtetit në vitet 2011-2013, ndërkohë që pjesa tjetër ishin donacione të kushtueshme, të cilat sistemi kishte dështuar t’i shpërndante në kohën e duhur te pacientët. “Barnat sillen në kufijtë e skadencës, me afat 6 muaj apo maksimumi 1 vit,” – tha një zyrtar i QSUT-së.
