Dosja “Muzin” e zbardhur nga zyrtari amerikan tregon se PD në 2017 mori 500 mijë USD për lobing nga Rusia përmes kompanive fantazëm. Reagojnë mediat e huaja CNN, BBC, AFP, DW, EURONEWS etj
Financimi i PD nga Rusia. Lulzim Basha e mohon, Sali Berisha kërkon rihapje hetimi
Lulzim Basha ‘peng’ i Kryeministrit Rama dhe mercenarëve te Presidentit rus Putin
- Paratë e pista të lobingut rus, ‘nxijnë’ ish- kreun e Partisë Demokratike.
- Dosja ‘Muzin’ e zbardhur nga zyrtari amerikan: PD në 2017 mori 500 mijë dollarë për lobing nga Rusia
Ndërkombëtarët i dhanë mbështetje të pakursyer Lulzim Bashës për vite me radhë edhe pse skandali i lobimit rus ishte bërë publik. Por ishte një lajm i publikuar edhe një herë nga Zëri i Amerikës ku thuhet se Rusia e Putinit ka dhënë qindra milionë dollarë për partitë politike në botë. Mes tyre, burimi thotë se 500 mijë dollarë janë dhënë për PD-në e drejtuar nga Lulzim Basha. Historia nis përmes një miku të Lulzim Bashës në Vjenë. Biznesmeni kishte një ortak rus, çka do i bënte më të lehta fijet e lobimit. Të parët që ranë në hile kësaj historie ishin autoritetet gjermane, që hetuan më tej dhe zbuluan se biznesmeni-mik i Bashës punonte me rusët. Dosja gjermane u mor më tej nga SHBA dhe hetimet u thelluan. Por teksa Basha e ndjente nxehtësinë që po i afrohej, i pari që i erdhi në ndihmë ishte Edi Rama. Ai bëri gjithçka mundej që dosja e Bashës të mos përparonte nga drejtësia shqiptare. Dhe kështu ndodhi, Basha shpëtoi nga hetimet dhe mbeti peng i kryeministrit. Ndërsa është rikthyer edhe një herë ky skandal duket se kërkon të sulmojë ‘armiqtë’ e rinj. Por kryedemokrati Sali Berisha kishte njoftuar vetëm pak ditë më parë se Lulzim Basha nuk mund të fluturojë në SHBA, pasi me të mbërritur atje do të arrestohej nga FBI për shkak të skandalit të lobimit rus. Teksa një zyrtar i lartë amerikan ka deklaruar se detaje të reja të këtij hetimi do të publikohen për të zbardhur të gjithë aferën. Ish- Kreu i Partisë Demokratike Lulzim Basha i ka mohuar këto akuza në një publikim për mediat.
SHBA: Rusia ka financuar parti politike në dhjetra vende; mes tyre përmenden 500 mijë dollarë që i janë dhënë PD-së në Shqipëri në 2017
Rusia ka dhënë fshehurazi mbi 300 milionë dollarë për parti politike dhe kandidatë në dhjetëra vende, që nga viti 2014 dhe Presidenti Putin është angazhuar në financim të fshehtë politik në mbarë botën, sipas një zyrtari të lartë amerikan. Sipas zyrtarit që foli me median, ky është përfundimi në të cilin arrin një raport i komunitetit amerikan të zbulimit, i cili ka analizuar financimet e Rusisë “në mbi 24 vende gjatë viteve të fundit në një përpjekje për të manipuluar demokracitë nga brenda”. Sipas një burimi me njohuri mbi raportin amerikan të zbulimit, Shqipëria është një nga këto vende. “Në Shqipëri, Rusia i dha rreth gjysmë milioni dollarë Partisë Demokratike në 2017 përmes kompanive fantazëm”, tha burimi i qeverisë amerikane. Burimi nuk dha hollësi të mëtejshme për rastin e Shqipërisë. Por viti 2017, emri i Partisë Demokratike dhe shifra e përmendur prej 500 mijë dollarësh përkojnë me hetimet që janë hapur në Shqipëri në atë kohë ndaj PD-së bazuar në deklarimet, që firma lobuese amerikane ‘Muzin Capitol Partners’ ka raportuar se ka marrë nga PD-ja. Firma lobuese amerikane kishte deklaruar në vitin 2018 në Departamentin amerikan të Drejtësisë, se ajo kishte marrë gjithsej tre pagesa, në një shumë prej 675 mijë dollarësh, për punën e saj në favor të Partisë Demokratike në vitin 2017. Pagesa e parë mban datën 24 mars 2017 dhe është bërë nga firma ‘Biniatta Trade LP”, me një vlerë prej 150 mijë dollarësh, dy pagesat e tjera, sipas deklararimit janë bërë nga Partia Demokratike, njëra më 27 mars, për 25 mijë dollarë, dhe tjetra më 9 qershor për 500 mijë dollarë. Në një artikull të gjatë hulumtues rreth këtyre pagesave për Muzin Capitol, revista amerikane Mother Jones ngrinte dyshime se pas një pjese të pagesave të bëra nga kompania “Biniatta Trade LP” me bazë në Skoci, për aktivitete lobimi në favor të PD-së para zgjedhjeve të vitit 2016 në Shqipëri, qëndronin biznesmenë rusë. Në deklarimet e firmës Muzin për Departamentin e Drejtësisë thuhet se pagesa ishte bërë nga Partia Demokratike. Megjithatë shifra prej 500 mijë dollarësh figuron në kontratën me Biniattën dhe jo me PD-në, sipas Mother Jones. Autoritetet shqiptare hapën hetime lidhur me këto pagesa, duke thënë se “paratë janë paguar nga një kompani offshore dhe se Partia Demokratike nuk ka raportuar në mënyrë të rregullt pranë Komisionit Qëndror të Zgjedhjeve, paratë e shpenzuara, duke iu shmangur kështu legjislacionit për parandalimin e pastrimit të parave”. Më pas prokuroria u tërhoq nga akuza për pastrim parash dhe Gjykata pushoi çështjen e ngritur për falsifikim dokumentash ndaj Lulzim Bashës, Arben Ristanit dhe Ilir Dervishajt lidhur me pagesat për firmën Muzin. Ish-kryetari i Partisë Demokratike, Lulzim Basha ka dhënë shpjegime të ndryshme për pagesën 500 mijë dollarëshe, duke u shprehur në fillim se ajo u dha nga shqiptaro-amerikanët, por më pas është shprehur se “Çfarë ka bërë lobuesi dhe si e ka bërë lobuesi e di ai. Janë marrëdhënie të firmës Muzin me palë të treta”. Veç Shqipërisë, sipas burimit të administratës amerikane, në raport përmenden edhe Bosnja dhe Mali i Zi, respektivisht për financimin e fushatës së udhëheqësit të serbëve të Bosnjës, Milorak Dodik për zgjedhjet e vitit 2018 dhe fonde për partinë pro-ruse Fronti Demokratik. Zyrtari amerikak tha për median se Shtetet e Bashkuara janë angazhuar me aleatë dhe partnerët për të mbledhur më shumë informacion për rrezikun e financimit rus për partitë politike. “Ajo që është më tronditëse për këtë studim është se shohim praninë e financimit të fshehtë rus në mbarë botën… Po i paralajmërojmë këto parti të huaja dhe kandidatë se nëse pranojnë fshehurazi paratë e Rusisë. Ne kemi mundësinë t’i ekspozojmë, dhe do t’i ekspozojmë”, -shtoi ai.
Ironia e Edi Palokës për lajmin se PD u financua nga Rusia në 2017-ën: Kur futesh në pazar të blejnë dhe të shesin!
Kreu aktual i Këshillit Kombëtar të Partisë Demokratike, Edi Paloka ka reaguar pas artikullit të Zërit të Amerikës, i cili shkruan se PD është financuar nga Rusia në vitin 2017, vit në të cilin ka qenë në drejtim të partisë Lulzim Basha. Teksa ka ndarë artikullin në faqen e tij të ‘Facebook’, Paloka me ironi kujton se kush futet në pazar edhe blen edhe shet mirëpo edhe e blejnë edhe e shesin. ‘Kur futesh në pazar, blen dhe shet po dhe të blejnë e të shesin…! Kujtesë për të tjerët !’– shkruan Paloka.
Genc Pollo: I besova Bashës se burimi i financimit nuk ishte Rusia! Kërkoj transparencë
Anëtari i Këshillit Kombëtar i Partisë Demokratike, Genc Pollo ka reaguar pas artikullit të Zërit të Amerikës për financimet e Rusisë për partitë politike, pjesë e të cilave ishte dhe Shqipëria. Pollo thotë se si deputet i zgjedhur në vitin 2017 i ka besuar shpjegimeve publike të asokohe që i ka dhënë kryetari Lulzim Basha se në asnjë mënyrë burimi i financimit nuk ka qenë Rusia ose të tjera shtete apo organizata jo miqësore me Shqipërinë. Pollo thotë se financimet mund të kenë ndodhur jashtë buxhetit zyrtar të partisë dhe kanë përdorur guackat fiskale jashtë vendit e se mund të kemi të bëjmë me parregullsi administrative e ligjore ose me shkelje penale. Pollo propozon që udhëheqja aktuale, përfshi kryetarin Sali Berisha e Sekretarin e Përgjithshëm Flamur Noka të ndërmarrin një audit të plotë të çështjes të drejtuar nga një Komision i Posaçëm. Raporti i auditimit duhet t’u prezantohet Kryesisë, Këshillit Kombëtar, Grupit Parlamentar si dhe të publikohet në ëebsitin e partisë.
BBC: 500 mijë USD lobim rus për Lulzim Bashën, Rusia ka lobuar për PD në 2017
Jo vetëm Zëri i Amerikës, por edhe BBC ka transmetuar skandalin e lobimit rus në SHBA për llogari të Partisë Demokratike dhe Lulzim Bashës në vitin 2017. BBC citon një zyrtar pranë administratës së Presidentit Joe Biden, i cili pohon se kjo është vetëm maja e ajsbergut. Pas Zërit të Amerikës edhe BBC, media kombëtare e Britanisë së Madhe i ka kushtuar një hapësirë të rëndësishme financimit rus për lobimin e Partisë Demokratike në vitin 2017 në SHBA. “Rusia ka shpenzuar fshehurazi më shumë se 300 milionë dollarë që nga viti 2014 për të ndikuar tek politikanët në më shumë se 24 vende, sipas pretendimit të ngritur nga SHBA”- transmeton BBC. Në artikull theksohet se bëhet fjalë për një shifër prej 500 mijë dollarësh që i është kaluar Partisë Demokratike në vitin 2017. Në atë kohë selia blu drejtohej nga Lulzim Basha, i cili është akuzuar shumë herë publikisht për dosjen ‘Muzin’. Në shkrim, BBC ka theksuar një zyrtar të lartë nga administrata e Presidentit Joe Biden, i cili ka thënë se kjo është vetëm maja e aisbergut. Pas publikimit të lajmit, zëdhënësi i Departamentit të Shtetit, Ned Price, e quajti financimin e dyshuar të fshehtë të Rusisë një sulm ndaj sovranitetit.
Mediat ndërkombëtare CNN, AFP, DW, WP jehonë lobingut rus për PD
Lobingu rus në Shqipëri është në faqet e mediave më në zë ndërkombëtare. CNN, BBC, AFP, AP, DW, EURONEWS, WP raportojnë se Shqipëria ka qenë një prej vendeve ku Rusia ka lobuar në mënyrë që të rrisë influencën e saj në politikë. Në artikujt e botuar shkruhet qartë se lobingu rus i ka shërbyer Partisë Demokratike në vendin tonë përmes firmës lobuese amerikane ‘Muzin Capitol Partners’. “Duke folur për The Washington Post , një zyrtar i lartë i administratës njohu ndikimin rus në zgjedhjet e fundit në Shqipëri, Bosnjë dhe Mal të Zi,”- thuhet në një artikull. “Një burim i administratës i njohur me gjetjet pretendoi se Rusia kishte shpenzuar rreth 500,000 dollarë për të mbështetur Partinë Demokratike të qendrës së djathtë të Shqipërisë në zgjedhjet e vitit 2017 dhe gjithashtu financoi partitë ose kandidatët në Bosnjë, Mal të Zi dhe Madagaskar, sipas agjencisë së lajmeve AFP,”- thuhet në një tjetër artikull.
