Drejtuesi politik i PD për qarkun e Tiranës, Belind Këlliçi, e ka cilësuar programin për Rininë, një program të qartë e serioz.
Në një postim në facebook, Këlliçi thotë se bashkë me kreun e PD, programi i rinisë u prezantua aty ku rithemelimi i PD, mori energjinë dhe ritmin e duhur me Foltoren historike të FRPD.
“Në atë foltore të 7 Nëntorit 2021, u fol për promovimin e të rinjve, për krijimin e hapësirave për të rinjtë në PD. Ku e gjejnë veten të rinjtë sot në PD?
Janë plot 58 kandidatë nën moshën 40 vjeç, që janë kandidatë zyrtarë për deputetë të PD në këto zgjedhje dhe 9 prej tyre vijnë pikërisht nga rradhët e FRPD.
Në këtë mision të madh shpëtimtar për Shqipërinë, të rinjtë kanë shansin historik që të vënë të gjitha energjitë e tyre më të mira ne funksion të ndryshimit që shqiptarët presin.
Partia Demokratike ka një program të qartë dhe serioz për rininë.
Nga përjashtimi nga tatimi mbi të ardhurat gjer në moshën 25 vjeç tek stimujt fiskalë dhe mbështetja financiare për investitorët nën moshën 35 vjeç, ne synojmë t’i japim të rinjve dhe Shqipërisë një shans të ri”, shkruan më tej drejtuesi politik i PD për Tiranën, Belind Këlliçi, duke ftuar të rinjtë të votojnë PD, nr.1 në zgjedhjet e 11 majit pasi sot është koha e rinisë.
