Presidentja e Republikës së Kosovës Vjosa Osmani në një intervistë për agjencinë Reuters tha se “Kosova është nën sulm” dhe se grupi (i armatosur) thjesht ushtroi synimet dhe motivet e Serbisë si shtet dhe Vuçiçit si udhëheqës,- tha Osmani. Presidentja e Kosovës tha se Serbia ka ende pretendime territoriale ndaj Kosovës dhe po vepron për të përmbushur një ‘model të Krimesë’ duke krijuar tensione në veri të Kosovës, ku rreth 50,000 serbë vendas ende e shohin Beogradin si kryeqytetin e tyre dhe refuzojnë sundimin nga Prishtina,- shkruan Reuters. “Ajo që unë do t’i thosha presidentit Vuçiç është:- ndalini ngatërresat me Kosovën. Kosova do ta mbrojë lirinë, pavarësinë dhe sovranitetin e saj me çdo çmim. Ata po përpiqen të realizojnë një model të Krimesë në Republikën e Kosovës, por ne absolutisht nuk do ta lejojmë të ndodh! Ne do të mbrojmë çdo pëllëmbë të territorit të Kosovës”. Osmani në Reuters tha se sulme të ngjashme mund të përsëriten edhe në një të ardhme të afërt dhe kërkoi nga bashkësia ndërkombëtare që të bëjë gjithçka që Serbia të mos përkrahë grupe të tilla. “Jam shumë e shqetësuar se sulme të tilla, qoftë edhe më të mëdha, mund të ndodhin në të ardhmen nëse Serbia nuk dënohet, para së gjithash për këtë akt terrorist agresioni”, -tha ajo. Presidentja tha se bisedimet mes dy vendeve nuk mund të vazhdojnë si më parë. “Absolutisht nuk është më si zakonisht”, -tha ajo. “Ne kemi qenë viktima të një agresioni të Serbisë dhe të gjithë duhet ta trajtojnë atë si të tillë, edhe në qasjen e tyre ndaj Serbisë tani e tutje”.
