Ministri Bledi Çuçi: Nis transformimi për adaptimin e inovacionit në Polici, 10 makina inteligjente në aksion për abuzimet në rrugë

56
Sigal

Ministri i Brendshëm Bledi Çuçi në një reagim ka deklaruar se tashmë janë vënë në aksion 10 makinat e reja inteligjente, të cilat iu shtuan flotës së mjeteve të policisë vetëm pak ditë më parë. “ 10 makinat e reja inteligjente janë tashmë në rrugët e Shqipërisë për të gjurmuar dhe parandaluar shoferët që shkelin rregullat e qarkullimit. Përmes këtyre investimeve siguria rrugore do të ngrihet në një tjetër dimension, duke mbështetur syrin e gabueshëm njerëzor me syrin e pagabueshëm të teknologjisë më të avancuar, e cila nuk njeh e as pranon ndërhyrje.” Ministri shprehet se ky është vetëm fillimi i transformimit të Policisë së shtetit drejt teknonologjisë.  “Çfarë kemi nisur të bëjmë është veçse fillimi i një transformimi të madh për adaptimin e inovacionit në Policinë e Shtetit dhe për të qenë shumë më përpara atyre, që tentojnë të thyejnë ligjin.”

Ndërsa Policia e Shtetit njofton se Flota e re e automjeteve të Policisë Rrugore, e pajisur me bazën logjistike bashkëkohore, makinën inteligjente dhe radarët automatikë, gjatë një jave, pezulloi 683 leje drejtimi, për shpejtësi mbi normat e lejuara. Policia e Shtetit bën të ditur se janë vendosur po ashtu, 1610 masa administrative, për shpejtësi mbi normat e lejuara, por pa sanksionin plotësues pezullim i lejes së drejtimit. Gjithashtu, janë evidentuar dhe ndaluar 233 automjete të shpallura “alert”, kryesisht për shpejtësi, të evidentuara nga makina inteligjente. Drejtuesve të këtyre mjeteve u është pezulluar leja e drejtimit, si dhe janë ndëshkuar me masat administrative përkatëse. “Janë evidentuar dhe ndëshkuar 22 drejtues mjetesh, për gara shpejtësie. Janë evidentuar dhe ndëshkuar 431 drejtues mjetesh, për parakalime të rrezikshme në rrugë”, bën të ditur Policia. “Nga përpunimi, që i kanë bërë operatorët pamjeve filmike të skanuara nga makina inteligjente, shumë drejtues mjetesh janë evidentuar në shkelje të dyfishtë ose të trefishtë. Përveç shpejtësisë së skanuar nga makina inteligjente, nga përpunimi i të dhënave ka rezultuar se drejtuesit nuk kishin vendosur rripin e sigurimit dhe/ose kishin përdorur edhe celularin gjatë drejtimit të automjeteve”, informon Policia. Policia e Shtetit apelon për të gjithë përdoruesit e rrugës që të respektojnë rregullat e qarkullimit rrugor, sepse të gjitha akset rrugore, nga Morina në Sarandë janë në monitorim 24/7 nga Policia Rrugore, e cila ka në dispozicion mjete logjistike bashkëkohore, për të evidentuar dhe ndëshkuar drejtuesit e automjeteve, që shkelin rregullat e qarkullimit rrugor.