Meta: Shumë shpejt do të ketë nisma të reja të cilat e mbështesin aktivitetin fason, si aktivitetin kryesor punëdhënës sot në Sh

206

Kryetari i Kuvendit z.Ilir Meta merr pjesë në inagurimin e një fabrike fasonerie në rrethin e Devollit

Kryetari i Kuvendit, z.Ilir Meta, mori pjesë në inagurimin e një fabrike fasonerie në rrethin e Devollit, e cila ka punësuar 540 punonjës dhe pritet që të hapë edhe 250 vende të reja pune. Në këtë takim, ishte i pranishëm dhe Ministri i Mirëqenies Sociale dhe Rinisë, z.Erjon Veliaj.  Kryetari i Kuvendit u njoh me kushtet e punës dhe me projektet e zhvillimit të këtij biznesi me impakt për të gjithë zonën përreth. Z.Ilir Meta vlerësoi biznesin fason si aktivitetin kryesor punëdhënës sot në Shqipëri. “Unë dua të shpreh  kënaqësinë time të veçantë që jam sot këtu së bashku me Ministrin e Mirëqenies Sociale dhe Rinisë, z.Veliaj, sepse vijmë në një biznes mjaft të konsoliduar prej gati 20 vitesh, një biznes të suksesshëm, një nga bizneset kryesore punëdhënëse në të gjithë këtë qark që punëson 540 gra vetëm këtu në qytetin e Bilishtit. Por vijmë këtu për të inauguruar këtë ndërtim të ri, të standardeve më të larta evropiane, këto kushte të reja, të jashtëzakonshme, mjaft cilësore. Njëkohësisht, vijmë këtu për të inkurajuar këtë investim të shkëlqyer, shqiptar dhe grek njëkohësisht, për të shtuar vende të reja pune. Sikurse kemi biseduar dhe informuar, po punohet për të zgjeruar më tej këtë aktivitet dhe për të shtuar dhe 250 vende të reja puna, gjë që është një kontribut i jashtëzakonshëm për komunitetin e Devollit dhe të Korçës që e do aq shumë punën. Kryetari i Kuvendit, z.Ilir Meta, theksoi se shumë shpejt do të ketë nisma të reja për të mbështetur aktivitetin fason. “Vijmë dhe në një moment, kur mbështetja për biznesin fason dhe për aktivitet e manifakturës po rritet gjithmonë dhe më shumë, dhe jam i sigurt që shumë shpejt do të ketë nisma të reja të cilat e mbështesin këtë aktivitet, si aktivitetin kryesor punëdhënës sot në Shqipëri, por jo vetëm kaq, por edhe një nga aktivitetet kryesore eksportuese dhe që kanë ndikim të jashtëzakonshëm në të gjithë zhvillimin ekonomik  dhe social të vendit”, theksoi z.Ilir Meta. Ministri i Mirëqenies Sociale dhe Rinisë, z. Erjon Veliaj, u shpreh se qeveria shumë shpejt do të kalojë disa reforma të rëndësishme të cilat do të ndikojnë në rritjen e nivelit të pagave, përmirësimin e sigurimeve shoqërore dhe përkrahjen e investitorëve.