Presidenti Ilir Meta shprehet se do të rikthehet president i Shqipërisë pas 25 vitesh.
I ftuar në Çim Peka Live, Meta tha se presidenti i ri hyn në zyrë pas 24 korrikut 2022.
“E sigurt që pasi të mbaroj këtë mandat do rikthehem për një mandat të dytë si President pas 25 vitesh.
Presidenti i ri hyn në zyrë pas 24 korrikut 2022. Për mua nuk ekziston asnjë shqetësim për çështjen në Gjykatën Kushtetuese, sepse mbi të është Gjykata Europiane. Sistemi i drejtësisë është i kapur totalisht. Këtë sistem do ta shkundë populli shqiptar shumë shpejt”, u shpreh Meta.
Kreu i shtetit theksoi se ka qenë president mbi palët.
Duke iu referuar përballjes me Gjykatën Kushtetuese, Meta tha Presidenca i është përgjigjur institucionalisht të gjitha pyetjeve të ngritura.
“Unë i jam kundërvënë dhe opozitës dhe mazhorancës, kjo tregon që nuk kam mbrojtur asnjë nga palët. Se çfarë do bëjë Gjykata ajo është punë e gjykatës, ne i jemi përgjigjur institucionalisht atyre pyetjeve. Ilir Meta, do të shkoj tek populli i 2 marsit”.