Pas mbledhjes së Këshillit të Ministrave, si rrallë herë kryeministri Edi Rama tha se qeveria edhe këtë vit do të japë 5 mijë lekë të reja për pensionistët, 11 mijë lekë të reja për familjet në nevojë dhe pensionistët në invaliditet. Duke nisur nga viti që vjen, numri një i qeverisë, Rama tha se qeveria do të ndihmojë në janar nënat me 3 fëmijë, të cilave do t’ju paguajë siguracionet shoqërore sikur janë në punë. Sa i përket Taulant Ballës, kur shefi i Qeverisë u pyet për akuzat të cilat rëndojnë mbi kryetarin e grupit Parlamentar të PS, ai deklaroi se nuk merret me spekulimet, por nëse ka fakte akuzuesit duhet t’i paraqesin. Ndërsa ka shtuar se Partia Socialiste nuk bëhet mburojë “Unë i besoj fakteve, nuk merrem me thashetheme dhe spekulime. Mbi të gjitha unë i ruhem gjysmë e vërtetave se ato janë gënjeshtrat më të mëdha. Nëse kanë fakte, i takon akuzuesve që t’i sjellin ato”- tha Rama. Kryeministri u pyet nga gazetarët për nismën Open Balkan dhe mënyrën sesi është interpretuar në Malin e Zi. Pas mbledhjes së Këshillit të Ministrave, Rama tha se ajo është 100% në përputhje të plotë me Bashkimin Europian dhe pjellë e procesit të Berlinit. Sipas kryeministrit, masat e sigurisë në 6 Dhjetor nuk vendosen nga Shqipëria, por nga institucionet e tjera ndërkombëtare“Masat e sigurisë nuk negociohen me askënd, janë të vendosura nga vetë Këshilli Europian, që kudo ka akvitete ka masa standarde, forcat tona punojnë me organizatorët e samitit, që janë në fakt në KE prej shumë kohësh për masat e sigurisë. S’ka ndodhur kurrë që në Shqipëri të vijnë të gjithë lideret e BE, dhe në mbështetje të asaj linje që e sheh Shqipërinë si një faktor kyç në rajon,” -u shpreh Rama. Kryeministri priti në takim Presidentin gjerman, i cili ndodhet në vizitë dyditore në Shqipëri.