Kryeministri Rama: Krenarë për renditjen e Shqipërisë nga Barometri i Turizmit të OKB si të parën në Evropë për rritjen e fluksit të turistëve

19
Sigal

Barometri i Turizmit i OKB-së tha se Shqipëria është destinacioni me performancën më të mirë në Evropë për vitin 2023, përsa i takon rritjes së flukseve turistike. Këtë e bëri të ditur përmes një reagimi vetë kryeministri i Shqipërisë Edi Rama, i cili të premten ripublikoi edhe disa statistika të publikuara nga barometri i turizmit i Organizatës së Kombeve të Bashkuara.“Nga ato lajme që ta mbushin zemrën”, tha mes të tjerash në reagimin e tij kreu i qeverisë. Rama e cilësoi këtë punë mjaft pozitive dhe tha se “ky është rezultat shumë domethënës i një përpjekjeje të gjithanshme, i cili shënon nivelin e ri ku është ngjitur Shqipëria në sytë e botës dhe po ashtu tregon drejtësinë e politikave tona zhvillimore në rrugën drejt majës së Shqipërisë 2030”. “Hej miq dhe udhëtarë! Barometri i Turizmit i OKB-së sapo ka bërë të ditur se Shqipëria është destinacioni më i mirë në Evropë për vitin 2023! Jemi të emocionuar dhe krenarë që na vlerësojnë për peizazhet tona të bukura, kulturën e pasur dhe mikpritjen e ngrohtë”,- u shpreh kryeministri Rama i cili nuk nguron së ftuari turistët e huaj të vizitojnë vendin tonë. Kujtojmë se mbi 10 milionë turistë të huaj vizituan Shqipërinë gjatë vitit 2023, ndërkohë që shifra të larta vizitorësh vijuan edhe në muajt e parë të këtij viti, kur vetëm në janar 2024, vendi u vizitua nga rreth 500 mijë turistë të huaj.  Kryeministri garanton se “Shqipëria ka diçka për të ofruar për të gjithë”. “Nëse jeni në kërkim të aventurave në malet tona madhështore, relaksit në plazhet tona të pacënuara ose të një udhëtimi në rrugët tona historike, Shqipëria ka diçka për të ofruar për të gjithë. Ejani dhe shikojeni vetë pse të gjithë po flasin për Shqipërinë. Le të krijojmë kujtime së bashku që do të zgjasin gjithë jetën”,- tha në reagimin e tij kryeministri i vendit Edi Rama.