TIRANË – Kuvendi ka rrëzuar dy dekretet e Nishanit për kthimin e ndryshimet të ligjit për KLSH dhe Gjykatën e Lartë. Mazhoranca ka votuar kundër dekretin e Presidentit Bujar Nishani për kthimin e ligjit për organizimin dhe funksionimin e Gjykatës së Lartë, ku 78 deputetë votuan kundër këtij dekreti 39 pro dhe vetëm 1 abstenoi.
Po ashtu mazhoranca ka rrëzuar edhe dekretin e Nishanit për kthimin e ligjit për organizimin dhe funksionimin e Kontrollit të Lartë të Shtetit. 76 deputetë kanë votuar kundër, 40 deputetë pro ndërsa njëri prej tyre abstenoi.
Dekreti për Gj.Lartë,Xhafaj:Synojmë transparencë, Halimi: Ligji hipokrizi
Kreu i Komisonit të Ligjit, Fatmir Xhafaj ka rrëzuar pretendimet e Presidentit Nishani për emërimet në Gjykatën e Lartën. Sipas Fatmir Xhafajt me ligjin e ri synohet transparenca dhe objektivitet dhe vlerësim në meritën e kandidatëve që do të përzgjedhin.
Gjatë fjalës së tij, Xhafaj u shpreh se me ligjin që është aktualisht nuk ka transparencës pasi askush nuk e di se kush ishte kandidatura më e mirë, apo kush kandidoi.
“Shpallet vakanca. Kandidatët çojnë dokumentet Presidenti bën një takim formal dhe zgjedh anëtarin. Por askush nuk di se si u zgjodh apo se cili ishte kandidati më i mirë. Apo zgjidhet ndonjë tjetër që nuk ka kandiduar fare.”- tha Xhafaj lidhur për procesin aktual të përzgjedhjes së kandidaturave për Gjykatën e Lartë.
Ndërkohë që deputeti i PD, Eduard Halimi ka qenë pro kthimit të ligjit pas sipas tij shkelet Kushtetuta.
“Argumentet e Presidentit janë të qarta si kristali, në të njëjtën linjë me partnerët tanë të Komisionit të Venecias. Përveç procedurës ligji është antikushtetues. Përzgjedhja e anëtarëve të Gjykatës së Lartë janë eskluzivitet i Presidentit. Mazhoranca ia heq këtë të drejtë. Këshilli juaj me në krye ministrin e Drejtësisë do përcaktojë kandidaturën.” –tha Halimi duke shtuar se “Ky ligj ka si synim kapjen e Gjykatës së Lartë, t’i lëmë hipokrizitë.”
