Sekretari i Përgjithshëm i Partisë së Lirisë, Tedi Blushi deklaroi se misioni i ODIHR-it ka damkosur zgjedhjet e 11 majit si jo të lira dhe të pabarabarta, duke denoncuar terrorin elektoral të kryer nën drejtimin e qeverisë Rama.
Ai thekson se vëzhguesit ndërkombëtarë kanë konstatuar frikësim të qytetarëve, keqpërdorim të administratës dhe presion politik gjatë procesit zgjedhor. Sipas Blushit, këto janë dëshmi të qarta për krizën e thellë të demokracisë dhe mungesën e legjitimitetit në vend.
Ai kritikon ashpër SPAK-un për heshtje të qëllimshme dhe për shndërrimin në një vegël të pushtetit, duke e akuzuar për mosveprim ndaj krimeve zgjedhore dhe për ndjekje selektive ndaj opozitës. Në këtë kontekst, Blushi e konsideron qeverinë Rama përgjegjëse për shkatërrimin e standardeve demokratike dhe thekson se zgjedhjet kanë shkelur kriteret ndërkombëtare, përfshirë ato të Kopenhagenit.
Partia e Lirisë, sipas tij, është e vendosur të vazhdojë betejën kundër manipulimeve zgjedhore dhe frikësimit të votuesve, duke kërkuar zgjedhje të lira si kusht për integrimin europian të Shqipërisë.
Fjala e plotë:
Partia e Lirisë përkrah plotësisht qëndrimet shumë të qarta të kreut të misionit të vëzhguesve të ODIHR, ambasadorit Lamberto Zannier se zgjedhjet e 11 Majit në Shqipëri nuk ishin as të barabarta dhe as të lira.
Ky konstatim shënon një akt zyrtar damkosës ndërkombëtar për terrorin elektoral të kryer në 11 Maj nën drejtorim e Narkoqeverisë.
Përballë këtyre konstatimeve të rënda, të publikuara nga një institucion ndërkombëtar me autoritet të pakundërshtueshëm, është e qartë se Shqipëria tanimë ndodhet në një krizë të thellë legjitimiteti dhe demokracie.
Narkoqeveria ka konsumuar në 11 Maj një nga format më të rënda të manipulimit dhe intimidimit elektoral.
Vëzhguesit e ODIHR, siç dëshmoi ambasadori Zannier kanë parë me sytë e tyre qytetarë të trembur, presione të hapura, keqpërdorim flagrant të administratës publike dhe mjeteve shtetërore në favor të partisë në pushtet.
Kjo është një akuzë e drejtpërdrejtë dhe e padiskutueshme ndaj Edi Ramës, se zgjedhjet nuk janë zhvilluar në një ambient të lirë, të ndershëm dhe demokratik.
Në këtë sfond alarmant, heshtja e SPAK është një skandal më vete.
Ndërkohë që fakte dhe indicie të qarta për krime zgjedhore janë denoncuar publikisht, dhe tani edhe zyrtarisht nga vëzhgues ndërkombëtarë, SPAK vazhdon të sillet si një institucion që ka vendosur të mbyllë sytë, të mbyllë dosjet dhe të mbyllë gojën, njësoj si me krimet intelektuale të inceneratorit të Tiranës që nuk ekziston apo me dosjen e Charles McGonigal që fle në sirtarët e Altin Dumanit edhe pse në aktakuzën e drejtësisë ameriakane që e dënoi atë me burg, Edi Rama përmendet 14 herë.
Qytetarët e Shqipërisë po e shohin me se “drejtësia e re” nuk është një tjetër veçse një mburojë politike për krimin elektoral, që nisi me rrëmbimin terrorist të Presidentit të Partisë së Lirisë, Ilir Meta dhe u vulos me terrorin elektoral të 11 Majit.
Mungesa totale e ndëshkueshmërisë ndaj atyre që dhunojnë votën, blenë ndikimin dhe shtypin zërin e lirë të qytetarit, është një akt amnistie i papranueshëm që po minon çdo shpresë për zgjedhje të ndershme në të ardhmen dhe Altin Dumani është bashkëpërgjegjës kryesor, po aq sa Edi Rama, për inkurajimin, nxitjen dhe moshetimin e masakrës elektorale.
Qeveria e Edi Ramës është përgjegjëse për shkatërrimin e standardeve bazë të demokracisë në vend, ndërsa SPAK tashmë është kthyer në një vegël qorre të pushtetit, vetëm për të goditur opozitën dhe jo banditët që botërisht në Vorë ditën e zgjedhjeve morrën peng qendrat e votimit duke kërcënuar edhe drejtuesit dhe deputetët e opozitës.
Këto zgjedhje të kriminalizuara nuk përmbushën asnjë standard ndërkombëtar dhe shkelën dhunshëm kriteret e Kopenhagenit dhe Partia e Lirisë është e vendosur në vijimin e betejës së saj të pakompromis për të denoncuar me fakte dhe prova manipulimin e procesit zgjedhor përmes kapjes së shtetit dhe bashkëpunimit kriminal në frikësimin e votuesve dhe manipulimin e rezultateve; përndjekjes gjyqësore ndaj liderëve të opozitës; pandëshkueshmërinë institucionale ndaj krimeve zgjedhore, të cilat qartësisht u dënuan edhe në rezolutën shumë të rëndësishme të Parlamentit Europian si edhe me katër rezoluta të organizatave politike më të rëndësishme në botë, si IDC-CDI.
Partia e Lirisë dënon me forcë shkatërrimin terrorist të standardeve të zgjedhjeve dhe heshtjen kriminale të SPAK.
Terrori elektoral i 11 Majit kurrë nuk do të pranohet nga Partia e Lirisë dhe opozita sepse Shqipëria kurrë nuk mund të integrohet në Europë me “trenat bullgarë” të Edi Ramës, por vetëm duke ndjekur shinat kushtetuese dhe standardet ndërkombëtare që garantojnë votën e lirë dhe zgjedhje të ndershme.
Pa garantuar votën e lirë, themelin e demokracisë dhe shtetit ligjor, nuk mund të ketë integrim të Shqipërisë në familjen europiane!
