Ish-kryeministri Sali Berisha, shprehet se ndërhyrja e Edi Ramës në zgjedhjet parlamentare në Mal të Zi, përçau faktorin shqiptar në këtë shtet. Në një reagim në “Facebook”, Berisha shprehet se dy koalicionet shqiptare, nga 4 deputetë që duhet të merrnin në bazë të votave partiake, morën vetëm 2. Gjithashtu, ish-kryeministri shprehet se zgjedhjet në Mal të Zi u dëmtuan për shkak të ndërhyrjeve të presidentit serb Aleksandër Vuçiç dhe kishës ortotokse serbe.
“Qytetarët e Malit te Zi votuan të lirë dhe në dinjitet të plotë! Miq, dje qytetarët e Malit te Zi votuan të lirë dhe në paqe për parlamentin e tyre të ri dhe qeveritë vendore në 5 komuna. Ata meritojnë nderim dhe respekt. Megjithkëtë, dy binjakë siamezë ndërhynë në rezultatin e zgjedhjeve.
1-Serbomadhi Vuçiç, i cili: në një akt të pashembullt mobilizoi e transportoi me mace e me minj në Podgoricë, malazezët e serbëzuar të Beogradit dhe duke përdorur lidhjet e sëmura të tij me kryepeshkopin Irinej, angazhoi kishën ultranacionaliste serbe për fushatë elektorale në Mal të Zi, duke dëshmuar se jo punët e Zotit, por nacionalizmi i sëmurë janë pasioni i saj.
2-Në rezultatin e zgjedhjeve në të njëjtën kahje ndikoi edhe argati i Beogradit në Tiranë, Zografi bis.
Ky i fundit ndikoi nëpërmjet: përçarjes së shqiptarëve dhe partive të tyre politike, të cilat nga 4 morën 2 deputetë, sepse shqiptarët reaguan ndaj apelit të tij përçarës, duke mos dalë në votime. Së dyti, me apelin e tij “votoni Milon”, bëri që mijëra e mijëra qytetarë të Malit të Zi, që ishin të pavendosur, por që konsideruan apelin e tij të papranueshëm dhe një ndërhyrje fyese për vendin e tyre, vendosen ose të mos dalin fare në votime, ose të ndryshojnë mendim dhe të votojnë kundra Milos, i cili e kishte fitoren të sigurtë. Duke përfunduar uroj dhe njëherë qytetarët e Malit të Zi, për zgjedhjet dinjitoze.”
