Kur vajza ime filloi të hante ushqime të ngurta, mjeku i saj më dha një listë të ushqimeve që duheshin shmangur. Në atë kohë, u befasova kur pashë që mjalti ishte në listë. Mjalti promovohet shpesh si një ushqim i shëndetshëm – dhe me siguri, ka shumë përfitime shëndetësore – sa nuk prisja të mësoja se në të vërtetë mund të jetë i rrezikshëm për fëmijët nën moshën 1-vjeçare.
“Mjalti mund të përmbajë spore të një bakteri të njohur si clostridium botulinum”,– thotë Lauren Torrisi-Gorra, MS, RD, trajnere e “Sarah Wragge Wellness” dhe dietologe e regjistruar. “Këto spore mund të shkaktojnë një gjendje të rrallë, të njohur si botulizmi foshnjor te fëmijët nën 12 muajsh, sistemi tretës dhe imunitar i të cilëve është ende në zhvillim”.
Botulizmi i foshnjave është i rrezikshëm dhe kërkon trajtim mjekësor. “Simptomat përfshijnë kapsllëk, vështirësi në të ushqyer, probleme me frymëmarrjen, paralizë të muskujve, të qara të dobëta dhe shprehje të pakësuara të fytyrës”,– thotë Torrisi-Gorra. “Nëse mendoni se fëmija juaj mund të ketë këto simptoma, është e rëndësishme të kontaktoni mjekun tuaj.”
Por ndodh rrallë. Një individ preket nga kjo sëmundje kur një toksinë e prodhuar nga bakteret (Clostridium botulinum, Clostridium butyricum dhe Clostridium baratii) sulmon nervat e trupit. Sporet e këtyre baktereve gjenden në tokë, pluhur, madje edhe në ushqim. Por disa kushte mjedisore mund t’i bëjnë këto spore të rriten dhe të prodhojnë toksinë botulinum.
Mundësia më e mirë është të shmangni dhënien e mjaltit fëmijëve nën moshën 1 vjeç, madje edhe në produkte të pjekura. Lajmi i mirë është se sapo një fëmijë të jetë mbi moshën 1 vjeç, ai ka të ngjarë të ketë ekspozim të mjaftueshëm mjedisor ndaj baktereve, saqë nuk është më në rrezik aq të lartë për t’u sëmurur nga mjalti.
Megjithatë, Torrisi-Gorra vë në dukje se Qendrat për Kontrollin dhe Parandalimin e Sëmundjeve ende rekomandojnë kufizimin e të gjitha sheqernave të shtuara si mjalti (dhe ëmbëltuesit artificialë) derisa fëmija të jetë mbi moshën 2 vjeç, jo për shkak të botulizmit të foshnjave, por për shkak të shëndetit të mirë. “Kujdesuni për sheqernat e shtuara të fshehura në ushqimet e zakonshme si krakerat, salcat e ëmbëlsirave etj.”- thotë ajo.
Por cilat janë opsionet për t’i shtuar ëmbëlsi ushqimit të fëmijës kur fillon ushqimet e ngurta, para ditëlindjes së tij të dytë?
“Zgjedhjet që u sugjeroj klientëve të mi janë salca e mollës pa sheqer, kumbullat e thata pa squfur ose hurmat. Jo vetëm që këto ofrojnë ëmbëlsi pa sheqerna të shtuara, por ato ofrojnë edhe fibra dhe minerale.
Sapo fëmijët të jenë në gjendje të konsumojnë mjaltë në mënyrë të sigurt, mjalti ‘manuka’ është një lloj që unë rekomandoj. I prodhuar kryesisht në Zelandën e Re, ky mjaltë me lule është plot me antioksidantë. Është gjithashtu antimikrobik dhe është studiuar për aftësinë e tij në qetësimin e kollës dhe shqetësimet e tretjes”.
Por pavarësisht përfitimeve antioksiduese antibakteriale, është e rëndësishme të mbani mend se mjalti ende përmban sheqer. “Një lugë gjelle mjaltë përmban 17.3 gram sheqer, që është pothuajse 70 për qind e kufirit ditor të sheqerit të Akademisë Amerikane të Pediatrisë prej 25 gramësh sheqer në ditë”,- thekson Torrisi-Gorra.
Kjo nuk do të thotë se nuk ka vend për pak ëmbëlsi në dietën e një fëmije – thjesht mbani parasysh rekomandimet për sigurinë dhe ushqimin.
