Beatriz Flamini, një sportiste elitare dhe alpiniste nga Madridi, ka dalë pas 500 ditësh qëndrimi një shpellë të errët 70 metra nën sipërfaqen e tokës jashtë Granada-s, Spanjë. Beatriz hyri në shpellë më 20 nëntor 2021, tre muaj para se Rusia të pushtonte Ukrainën, për të studiuar se si mendja dhe trupi i njeriut përballen me vetminë ekstreme.
E monitoruar nga një ekip shkencëtarësh nga universitetet e Almería-s, Granada-s dhe Murcia-s, të cilët mbanin kontakte me të përmes teknologjisë speciale dhe të kufizuar, përmes mesazheve, Beatriz besohet se ka thyer rekordin botëror për kohën më të gjatë që një person ka kaluar vetëm në një shpellë.
Ajo doli nga strofulla nëntokësore të premten dhe, pas një kontrolli të shpejtë me një mjek dhe një psikolog, mbajti një konferencë për shtyp, për 50 minuta, ku foli për përvojat dhe njohuritë e saj.
Gjatë qëndrimit në shpellë, ajo u përball me shumë sfida. Megjithatë, arriti të ruajë arsyen dhe fokusin duke përdorur përvojën e gjatë për përgatitjen mendore. Ajo fliste me veten, por kurrë me zë të lartë dhe përqendrohej te mendimet, ndjenjat dhe veprimet.
Beatriz e kalonte kohën duke lexuar, shkruar, vizatuar dhe thurur. Ajo arriti të qëndrojë në formë të mirë fizike, lexoi 60 libra dhe përdori dy kamera për të dokumentuar përvojën për një dokumentar të ardhshëm.
Disa nga problemet? Për shembull, shumë miza u shfaqën në shpellë dhe vendosën larvat e tyre atje. Mizat e mbështollën atë. Ose rastet kur Beatriz kishte neps të vazhdueshëm për pulë me patate. Vetmia ishte më pak problem.
Para se të hynte në shpellë, ajo i tha ekipit të saj se nuk donte t’i tregonin se çfarë po ndodhte jashtë, edhe nëse kjo përfshinte humbjen e një njeriu të dashur.
Kur erdhi momenti për t’u larguar nga shpella, Beatriz u mërzit pasi nuk kishte mbaruar së lexuari librin e saj. Ajo doli nga shpella e lumtur, pasi kishte përmbushur ëndrrën për të qëndruar në shpellë për 500 ditë.
Dikush e pyeti: “Pse dukeshe aq e lumtur kur dole nga shpella?”
“Si do të ndiheshe po të bëje realitet një ëndërr? Do qaje?” u përgjigj ajo.
