Në Devoll janë arrestuar dy qytetarë pasi janë ndaluar dhe janë gjetur në mjetin që lëviznin me doza kanabisi. Drejtuesi i mjetit është qytetari me inicialet N.D 21 vjeç, i papajisur me lejen e drejtimit ndërsa pasagjer, qytetari me inicialet E.K 36 vjeç.
Sipas informacioneve dy qytetarët shpërndanin kanabis pranë zonës ku jetonin. Pas kontrollit të bërë në banesën e E.K-së është gjetur gjithashtu një sasi tjetër kanabisi dhe municion luftarak.
Priten veprimet e mëtejshme nga Prokuroria.
Njoftimi i Policisë:
Devoll/Goditet një rast i shpërndarjes së lëndëve narkotike në doza të vogla.
U kap me një sasi kanabisi, në automjetin që e drejtonte pa leje drejtimi, vihet në pranga 21-vjeçari.
Arrestohet në flagrancë edhe pasagjeri në automjet, pasi dyshohet se i kishte shitur 21-vjeçarit, sasinë e kanabisit. Gjatë kontrollit në banesën e tij, Policia gjeti një tjetër sasi droge dhe municion luftarak.
Nga veprimet hetimore dyshohet se këta 2 shtetas shpërndanin doza të lëndëve narkotike.
Shërbimet e Komisariatit të Policisë Devoll, në vijim të punës për parandalimin, evidentimin dhe goditjen e veprimtarisë së paligjshme të prodhimit dhe shitjes së lëndëve narkotike, goditën një rast të shpërndarjes së tyre në doza të vogla. Si rezultat, në bashkëpunim me specialistët për Hetimin e Trafiqeve të Paligjshme dhe Narkotikëve të DVP Korçë, u arrestuan në flagrancë shtetasit:
N. D., 21 vjeç, banues në Bilisht dhe E. K., 36 vjeç, banues në fshatin Bitinckë, Devoll.
Shërbimet e Policisë, në bazë të informacioneve të siguruara nga inteligjenca informative se këta shtetas ushtronin këtë aktivitet të paligjshëm, i kanë ndaluar ata në qytetin e Bilishtit. Gjatë kontrollit të ushtruar në automjetin tip “Land Rover” me drejtues shtetasin N. D. dhe pasagjer shtetasin E. K., u gjet një sasi e vogël me lëndë të dyshuar narkotike kanabis, të cilën 21-vjeçari dyshohet se ia kishte blerë shtetasit E. K. Nga verifikimet e kryera rezultoi se shtetasi N. D. e drejtonte automjetin pa leje drejtimi.
Në vijim të veprimeve procedurale, gjatë kontrollit të ushtruar në banesën e shtetasit E. K., u gjet një sasi tjetër me lëndë të dyshuar narkotike kanabis, një grirëse dhe një sasi municioni luftarak, të cilat u sekuestruan në cilësinë e provës materiale.
Materialet i kaluan Prokurorisë pranë Gjykatës së Shkallës së Parë Korçë, për veprat penale “Prodhimi dhe shitja e narkotikëve”, “Mbajtja pa leje dhe prodhimi i armëve, armëve shpërthyese dhe i municionit” dhe “Drejtimi i automjeteve në mënyrë të parregullt”.
