Për hir të mbajtjes nën kontroll të situatës, për të mënjanuar një kolaps të rëndë të ekonomisë, qeveria shqiptare ka “sakrifikuar” disi financat publike. Në raportin më të fundit për Europën dhe Azinë qendrore, Banka Botërore sinjalizon se, borxhi publik i Shqipërisë këtë vit dhe atë të ardhshëm do të jetë në 81.3% të Prodhimit të Brendshëm Bruto. Rritja është drastike krahasuar me vitin 2019, që vlerësohet ta ketë pasur nivelin e borxhit në krahasim me prodhimin kombëtar, në vetëm 68%.
Ajo që bie në sy nga ky projeksion alarmant i Bankës Botërore është fakti se, kjo normë prej 81.3% është më e dyta më e lartë mes vendeve të Ballkanit Perëndimor, madje me diferencë mjaft të ndjeshme. Madje, mes të gjitha vendeve të rajonit të gjerë të marra në analizë, Shqipëria është e treta më borxhin publik më të lartë, më mirë vetëm se Mali i Zi dhe Kroacia, sinjalizon Banka Botërore.
Vetëm në 2022, Banka Botërore parashikon një rënie të lehtë të borxhit publik të vendit tonë në raport me PBB, në vetëm 79.3%. Rritja e ndjeshme e barrës së borxhit është rrjedhojë e drejtpërdrejte e dy goditjeve që ka marrë ekonomia e vendit, tërmeti i fortë i nëntorit të vitit të kaluar dhe pandemia, që kanë nxitur një nevojë për financim, si dhe daljen e Shqipërisë në tregjet ndërkombëtare me marrjen e një eurobondi në vlerën e 600 mln eurove.
Ekonomia do të shënojë rënie me 8.4% në vitin 2020 sipas raportit të BB, goditja në sektorët ka rritur papunësinë në 11.9% në tremujorin e dytë,
Raporti i Bankës Botërore: Mbi 41% e shqiptarëve pritet të zhyten në varfëri
Banka Botërore, në raportin e saj të fundit të Rishikimit Ekonomik të vjeshtës për Europën dhe Azinë Qendrore, evidenton në seksionin për Shqipërinë, se kriza po shton varfërinë, kryesisht nëpërmjet rritjes së papunësisë.
Sipas vlerësimeve të bankës, pavarësisht masave që janë marrë, varfëria e moderuar (përqindja e popullsisë që jeton me më pak se 5.5 dollarë për person në ditë, të vlerësuara sipas barazisë së fuqisë blerëse, që eliminon diferencat e çmimeve mes vendeve) pritet të rritet me rreth 5 pikë përqindjeje. Aktualisht, ky tregues sipas tabelave të Bankës është 35.6%. Pas krizës, rreth 41.5% e popullsisë do të jetojë me më pak se 5.5 dollarë në ditë (sipas barazisë së fuqisë blerëse)..
Sipas raportit, mbyllja e bizneseve, operacionet e zvogëluara dhe ndërprerjet në zinxhirët e furnizimit dëmtuan prodhimin. Sektori i turizmit, një faktor kyç i rritjes, ka qenë shumë i prekur. Konsumi dhe vendimet për investime janë vonuar.
Si rezultat, PBB-ja e Shqipërisë pritet të kontraktohet/tkurret me 8.4% në vitin 2020, thotë banka.
Ngadalësimi në sektorët intensivë të fuqisë punëtore ka rritur papunësinë në 11.9% në tremujorin e dytë, nga 11.5% në tremujorin e dytë të vitit të kaluar.
Autoritetet shqiptare prezantuan subvencionim të pagave, rritën shpenzimet shoqërore, miratuan një moratorium të përkohshëm në instalimin e huasë dhe ofruan garanci sovrane kredie për të lehtësuar pagesat e pagave dhe kapitalit qarkullues, por pavarësisht këtyre masave, varfëria pritet të rritet.
Ende, shumë punonjës dhe sipërmarrës informalë përballen me një stres të rëndë ekonomik.
Nëse pandemia do të zgjatet më tej në kohë dhe zgjidhja që pritet nga vaksina do të vonohet, kjo mund të kërkojë masa të reja të distancimit social dhe kufizimit të aktivitetit ekonomik. Të tilla masa do të kishin ndikim direkt në rimëkëmbjen e sektorit të shërbimeve dhe të industrisë përpunuese, duke çuar të tjera biznese drejt falimentimit dhe duke e vonuar procesin e shëndoshjes së punësimit në ekonomi. Forma e kurbës së përtëritjes ekonomike, sipas Bankës Botërore, do të ndikohet shumë nga normalizimi i ekonomisë botërore.
Rritja u ngadalësua në 2.2 % në vitin 2019, pasi një thatësirë preku prodhimin e hidrocentraleve dhe një tërmet shkatërrues goditi Shqipërinë në nëntor të vitit 2019. Ndërsa vendi fillojë fazën e rindërtimit, pandemia e koronavirusit detyrojë mbylljen e sektorëve kyç të ekonomisë.
Deficiti i llogarisë rrjedhëse pritet të rritet me rreth 11.9 % të PBB-së në vitin 2020.
Ulja e fluksit të turistëve, rënia e porosive të përpunimit të tekstilit, si dhe çmimet e ulëta të naftës pritet të shkaktojnë një rënie të eksporteve me 37%.
Pozicioni fiskal i Shqipërisë pritet të përkeqësohet në 2020 pasi deficiti pritet të jetë 8.5% e PBB-së gjatë këtij viti.
