Tuneli më i gjatë hekurudhor në botë, Gotthard në Zvicër, do të mbetet i mbyllur për shërbimet e trenave të pasagjerëve pas një dalje nga shinat që shkaktoi dëme, që do të duhen muaj për t’u riparuar. Autoritetet zvicerane deklaruan se për momentin “nuk ka asnjë tregues” se kur do të rihapet tuneli.
Gjashtëmbëdhjetë vagona dolën nga shinat dhe janë ende brenda tunelit pas incidentit të 10 gushtit, raporton BBC. Mijëra produkte, duke përfshirë verë, limonadë dhe domate të konservuara të prera në kubikë, u shpërndanë nëpër shina.
Drejtori i Përgjithshëm i kompanisë hekurudhore kombëtare zvicerane SBB tha të mërkurën se Gotthard është një nga tunelet më të sigurt në botë. “Fakti që mund të ndodhë një aksident i tillë na ka goditur shumë. Fatmirësisht nuk ka të lënduar, por janë shkaktuar dëme të konsiderueshme materiale”, tha ai.
SBB tha se gjithsej rreth 8 km trase dhe 20,000 traversa betoni duhet të ndërrohen.
Megjithatë, njëra anë e tunelit nuk është prekur dhe duhet të jetë funksionale në parim për përdorimin e mallrave nga 23 gushti. Trenat e pasagjerëve nuk do të mund ta përdorin atë për arsye sigurie.
Tuneli, i cili u hap në vitin 2016 pas 20 vitesh punë, kushtoi më shumë se 12 miliardë dollarë. Projekti kalon Alpet dhe siguron një lidhje me shpejtësi të lartë midis Evropës veriore dhe jugore. Përveç transportit të pasagjerëve, tuneli është një kalim kyç për mallrat.
