Talebanët zgjerojnë kabinetin qeveritar, sërish nuk zgjedhin asnjë ministre grua

51
Sigal

Ditën e sotme, talebanët zgjeruan edhe më tepër kabinetin e tyre qeveritar, por ajo që u vu re ishte fakti se sërish nuk u zgjodhën përfaqësuese gra.

Mediet e huaja shkruajnë se kjo lëvizje dyfishon edhe më tepër zemërimin që pason protestat, që nisën menjëherë pas formimit të qeverisë me të gjithë përfaqësues burra, në fillim të këtij muaji. Komuniteti ndërkombëtar ka thënë se do të gjykojë talebanët dhe se njohja e një qeverie të udhëhequr prej tyre do të lidhet me faktin se si ata i trajtojnë gratë.

Në sundimin e tyre të mëparshëm të Afganistanit në fund të viteve 1990, talebanët, të cilët i përmbahen një interpretimi të ashpër të Islamit, kishin ndaluar vajzat dhe gratë të shkonin në shkolla, puna dhe i kishin distancuar tepër nga jeta publike.

Në një konferencë shtypi të martën, zëdhënësi i qeverisë talebane, Zabihullah Mujahid tha se mund të shtojë gra në kabinet në një kohë të mëvonshme, por nuk dha hollësi. Ai tha gjithashtu se talebanët po përgatisin rregulla për lejimin e vajzave adoleshente që të kthehen në shkolla dhe punë në përputhje me ligjin islam, por nuk tha se kur kjo mund të ndodhë.

Mujahid mbrojti shtesat e fundit në Kabinet, duke thënë se ato përfshinin anëtarë të pakicave etnike, siç janë Hazaras. Ai tha se deputetët u zgjodhën për aftësitë e tyre teknike.