Një shqiptare është arrestuar dje në SHBA pasi akuzohet se i ka vjedhur një të moshuari më shumë se 100 mijë dollarë.
Sipas policisë, vajza me emrin Anisa Llega e kishte takuar 84-vjeçarin, i cili ishte i ve dhe nuk kishte familje, në restorantin ku ajo punonte.
24-vjeçarja shqiptare ishte afruar me të, dhe i moshuari kishte filluar ta paguante që ajo t’i pastronte shtëpinë.
Më pas, tregon policia, Llega kishte filluar t’i kërkonte para për fatura të ndryshme, përfshi pagesat e makinës apo kredinë studentore.
Madje, Anisa e kishte mashtruar 84-vjeçarin duke i thënë se kishte tumor në tru dhe për operacionin i duheshin 30 mijë dollarë.
Në kohën kur ajo gjasme ishte në operacion, kishte udhëtuar drejt Majemit për pushime, shkruhet në mediat amerikane.
Policia e kuptoi skemën e mashtrimit të Anisës, kur një i njohur i të moshuarit kontaktoi me autoritetet.
24-vjeçarja shqiptare do të sillet në Gjykatën e Qarkut Kembrixh ditën e sotme.
