Një varkë me rreth 400 emigrantë rrezikon të mbytet në ujërat e Mesdheut. Mësohet se varka është bllokuar në ujërat, midis Italisë dhe Maltës, ndërsa qëndron në det prej gati 24 orësh. Ndërkohë, OJQ-të kanë paralajmëruar se është jashtëzakonisht e rrezikshme.
Raportohet se varka është nisur nga Tobruk i Libisë gjatë natës dhe në bord ka fëmijë dhe gra shtatzënë, si dhe persona me aftësi të kufizuara.
Çdo vit, dhjetëra mijëra emigrantë që ikin nga lufta, persekutimi dhe varfëria rrezikojnë rrugën e pabesë në kërkim të perspektivave më të mira ekonomike. Ata udhëtojnë me gomone që janë të papërshtatshme për udhëtim dhe mund të lihen të bllokuar, duke shkaktuar konflikte diplomatike midis vendeve evropiane në rajon.
Në mars, të paktën 28 emigrantë vdiqën pasi varkat e tyre u mbytën në brigjet e Tunizisë teksa përpiqeshin të kalonin Mesdheun për në Itali.
