Koronavirusi është shndërruar tashmë në një rrezik serioz për të gjithë Europën, ku së fundi është shënuar dhe rasti i parë në Greqi.
Mediat greke raportojnë se mostrat e një pacienti të trajtuar në Spitalin Attica kanë rezultuar pozitive me koronavirus.
I infektuari është një burrë nga Pireu, ndërsa nuk jepen më shumë detaje, nëse ai ka qenë në ndonjë nga shtetet e prekura masivisht nga ky virus.
Koronavirusi është kthyer në një alarm botëror, teksa numri i viktimave deri më tani ka shkuar në 2765, ndërsa i të infektuarve në mbi 81 mijë, në mbarë botën.
Ndërkohë në Itali numri i të infektuarve është rritur duke shkuar në 325, ku mbrëmë raportohej për 323.
Deri tani numërohen 11 viktima, ku viktima e fundit u regjistrua dje. Ajo ishte një e moshuar 76 vjeçare e cila ndërroi jetë në spital. Sipas shpërndarjes, 9 viktima janë në rajonin e Lombardisë, ndërsa dy viktima numërohen në Veneto.
Kujtojmë që edhe në vendet kufitare me Italinë janë riregjistruar të infektuar me virusin vdekjeprurës.
Në Zvicër është infektuar një person, ndërsa në Austri 2 të tillë. Pikat kufitare të Italisë me vendet fqinje kanë kontroll të lartë.
