Autoritetet shqiptare konfirmuan dje zyrtarisht se kanë vendosur të marrin në konsideratë për shqyrtim në muajin shtator të këtij viti, një kërkesë të SGS Automotive për të rritur çmimin e kolaudimit të automjeteve. Ministria e Transportit dhe Infrastrukturës pohon se kompania “SGS”, që ka koncesionin e shërbimi të kolaudimit të automjeteve, ka dorëzuar një kërkesë për të rishikuar tarifat e kontrollit me 6,7 %, rreth 200 lekë, duke kërkuar kështu rritje të çmimit të shërbimeve të kolaudimit. Ministria shqiptare e Transportit dhe Infrastrukturës thotë se kërkesa bazohet në pikën 8.2.2 të kontratës konçesionare të vitit 2009, që parashikon rishikim të tarifave çdo 3 vjet, për të reflektuar rritjen e normës së inflacionit. SGS e ka kërkuar rritjen e çmimit para afatit ligjor. Këtë e konfirmon MTI, e cila thotë se pas kësaj kërkese ka ngritur menjëherë një grup pune që shqyrtoi kërkesën e “SGS”. “Grupi i punës e vlerësoi si të parakohshme këtë kërkesë. Periudha kur palët sipas kontratës duhet të diskutojnë për tarifat bazuar në pikën 8.2.2 të kontratës, është Shtatori i vitit 2016”, – thotë ministria e Transportit. Kjo ministri nuk sqaroi nëse SGS do të ndëshkohet për mosrespektim kontrate, për faktin që ka kërkuar rritje çmimi para afati, duke investuar kështu ministrinë e cila u detyrua të ngrejë grup pune për të verifikuar dhe konstatuar se shtrenjtimi i çmimit kërkohej disa muaj para afatit ligjor. Që nga viti 2014, SGS aplikon çmime kolaudimi që shkojnë deri në 2950 lekë.