Prof. Dr. Adrian Civici
Rektor i Universiteti Mesdhetar i Shqipërisë
Ky takim i Shoqatës Alumni nuk është vetëm një ceremoni. Është një rit kthimi në shtëpi, një moment reflektimi dhe një rast për të parë përtej horizontit së bashku.Shoqata Alumni nuk është thjesht një emër në një statut. Është një urë që nuk lejon të humbasim lidhjen me njëri-tjetrin. Është kujtesa kolektive e përvojës sonë dhe një dritare e përhershme për bashkëpunim, kthim dhe ndikim. “Universitetet nuk maten me muret, por me njerëzit që formojnë. Dhe njerëzit nuk maten me titujt, por me ndikimin që lënë.” Ismail Kadare.
Nga bankat e shkollës në zyrat e vendimmarrjes dhe riskut
Shumë prej jush kanë përfaqësuar Shqipërinë në institucione të rëndësishme ndërkombëtare. Të tjerë janë kthyer në mentore të brezit të ri. Disa kanë ndërtuar biznese me ndikim social, të tjerë kanë ngritur zërin për kauza të drejta në shoqërinë civile. Por të gjithë, pa përjashtim, e keni sjellë me vete ADN-në e universitetit tonë: përkushtimin ndaj vlerës, pasionin për të mësuar dhe aftësinë për të bashkëpunuar.
Sipas një sondazhi të brendshëm që zhvilluam në vitin e kaluar:
82% e alumnive të UMSH janë punësuar brenda 12 muajve nga diplomimi,
39% janë në pozita drejtimi, ndërsa
26% kanë ndërmarrë nisma sipërmarrëse ose projekte sociale, shpesh në bashkëpunim me aktorë ndërkombëtarë. Këto shifra nuk janë thjesht tregues suksesi – janë dëshmi që një universitet që investon në individin, korr një shoqëri më të mirë.
Politika dhe shteti: kur alumni bëhen zë dhe udhëheqje
Ndër alumnit tanë ka përfaqësues në kabinetet qeveritare, këshilltarë politikash, zëdhënës të reformës në drejtësi, ligjvënës dhe drejtues projektesh me rëndësi kombëtare. Këta nuk janë vetëm emra në tituj, por janë shpresa se brezi i ri mund të qeverisë me mendje të kthjellët dhe ndërgjegje të pastër. “E ardhmja e vendimmarrjes nuk do të vijë nga politika e vjetër, por nga auditorët modernë. Universitetet si UMSH po formojnë lidershipin e epokës tjetër.”
Ky është roli që kemi zgjedhur: të mos përgatisim thjesht të diplomuar, por qytetarë që dinë të ndikojnë me dije, me etikë dhe me ndershmëri.
