OBSH: Koronavirusi mund të qëndrojë në ajër për disa orë

372
Sigal

Virusi i ri COVID-19 mund të qëndrojë në ajër për disa orë dhe në sipërfaqe të caktuar për disa ditë, në varësi të faktorëve si nxehtësia apo lagështia në ajër.

Bazuar në përfundimet e studimeve të fundit, Organizata Botërore e Shëndetit (OBSH) po shqyrton marrjen e masave shtesë mbrojtëse për stafin mjekësor që po lufton koronavirusin.

Sipas CNBC-së, Dr. Maria Van Kerkhove, pjesë e OBSH-së, ka sqaruar përfundimet e studimit të ri duke thënë:

“Koronavirusi transmetohet përmes piklave të pështymës që dalin nga personi i infektuar kur teshtin apo kollitet.

Kur bëhet procedura për të gjeneruar aerosol, procedurë që bëhet nëpër spitale e laboratore, atëherë stërpiklat e pështymës qëndrojnë në ajër për më shumë orë dhe mund të infektojnë më shumë njerëz.”

Ajo shtoi se “është shumë e rëndësishme që punonjësit e kujdesit shëndetësor të marrin masa paraprake shtesë kur punojnë në pacientë dhe i bëjnë ato procedura.”

OBSH rekomandon që personeli mjekësor të veshë të ashtuquajturat maska N95 sepse filtrojnë rreth 95% të të gjitha grimcave të lëngshme ose të ajrit.

Specialistët e OBSH-së thonë se sëmundja e frymëmarrjes përhapet përmes kontaktit njeri-njeri, pikat e bartura përmes teshtitjes dhe kollitjes, si dhe mikrobeve të mbetura në objekte të pajetë. Koronavirusi mund të shkojë në ajër, duke qëndruar i pezulluar në ajër në varësi të faktorëve të tillë si nxehtësia dhe lagështia, thanë ata.

Dr. Maria Van Kerkhove tha që zyrtarët shëndetësorë janë të vetëdijshëm se grupe të ndryshme shkencëtarësh bëjnë studime të ndryshme për të parë kushtet e ndryshme mjedisore që COVID-19 mund të vazhdojë të jetë infektues.

Shkencëtarët po shikojnë posaçërisht se si lagështia, temperatura dhe ndriçimi ultravjollcë ndikojnë në sëmundje, si dhe sa kohë jeton në sipërfaqe të ndryshme, përfshirë çelikun, tha ajo.

Robert Redfield, drejtor i Qendrave Amerikane për Kontrollin dhe Parandalimin e Sëmundjeve, raporton në Kongres muajin e kaluar se shkencëtarët e tyre po vlerësonin se sa kohë mund të mbijetojë COVID-19, veçanërisht në sipërfaqe të objekteve e materialeve të ndryshme.

“Në bakër dhe çelik mund të qëndrojnë deri në dy orë, ndërsa në sipërfaqe të tjera si kartoni ose plastika koha është më e gjatë,” tha Redfield.