Kontrolle të imtësishme në hyrje/dalje, në të gjitha pikat e kalimit kufitar, me qëllim parandalimin dhe goditjen e krimeve kufitare, si dhe për ndalimin e shtetasve në kërkim, të cilët tentojnë të lëvizin ilegalisht.
Në 3 pkk në vend, vihen në pranga 4 shtetas dhe procedohet penalisht 1 tjetër, për: •falsifikim, •mosdeklarim të hollash, •në kërkim ndërkombëtar nga 2 shtete ose •në kërkim për kontrabandë.
Sekuestrohen 2 pasaporta të dyshuara të falsifikuara dhe rreth 17 000 euro.
📍PKK Morinë/Në hyrje u ndalua shtetasi kosovar i shpallur në kërkim ndërkombëtar Jeton Dervishaj, 38 vjeç. Gjykata në Hungari e ka dënuar atë, me 2 vjet burgim, për kalim të kundërligjshëm emigrantësh, ndërsa Gjykata e Lartë në Serbi ka lëshuar ndaj tij, urdhër arresti, për të njëjtën veprimtari kriminale. Interpol Tirana, në bashkëpunim me homologët, vijon procedurat për ekstradimin e 38-vjeçarit.
📍PKK Rinas
Në dalje u arrestuan në flagrancë shtetasit kosovarë A. M., 26 vjeç dhe L. C., 23 vjeç, pasi kanë paraqitur 2 pasaporta që dyshohet se janë të falsifikuara. Në cilësinë e provës materiale u sekuestruan këto 2 dokumente.
Në hyrje u ndalua shtetasi i shpallur në kërkim Hasan Gatali (Qazimi), 40 vjeç, sepse Gjykata e Tiranës e ka dënuar me 9 muaj burgim, për veprën penale “Kontrabanda me mallra me regjim të ndërmjetëm”.
📍PKK Port Durrës/U referuan materialet në Prokurori, ku nisi procedimi në gjendje të lirë për shtetasin kosovar Rr. I., 54 vjeç, pasi nga kontrolli në automjetin që drejtonte, u gjetën dhe u sekuestruan më cilësinë e provës materiale, rreth 17 000 euro që ky shtetas synonte t’i fuste në Shqipëri, pa i deklaruar konform ligjit.
Materialet procedurale i kaluan prokurorive kompetente të juridiksionit të përgjithshëm, për veprime të mëtejshme.
