Një 45-vjeçar ka rënë në pranga në Cërrik nga policia pasi dyshohet se ka ushtruar dhunë ndaj bashkëjetueses së tij edhe fëmijës së saj të mitur.
Sipas komunikatës nga Drejtoria Vendore e Policisë së Elbasanit, 45-vjeçari i ka kanosur edhe për jetën.
Më tej në pranga ka rënë edhe babai i 45-vjeçarit pasi në banesë iu gjetën lëndë plasëse, armë e municione.
Policia thotë se nga kontrolli i ushtruar u gjetën dhe sekuestruan 2 kallëpe tritoli, 1 armë zjarri pushkë, 1 armë gjahu, municion luftarak dhe 1 mjet prerës (thikë).
Më tej bashkëjetuesja e 45-vjeçarit e cila edhe denoncoi, është pajisur me urdhër mbrojtje së bashku me fëmijën e saj, së bashku janë dërguar në një qendër sociale ku do të strehoen.
Teksa 45-vjeçari ra në pranga, materialet i kanë kaluar prokurorisë për veprime të mëtejshme hetimore.
Njoftimi i policisë:
Cërrik/Reagimi i Policisë menjëherë pas kallëzimit të një shtetaseje, parandalon ngjarje të mundshme kriminale në një familje.
Finalizohet operacioni policor i koduar “Risku”. Sekuestrohen 2 kallëpe tritoli, 1 armë zjarri pushkë, 1 armë gjahu, municion luftarak dhe 1 mjet prerës (thikë).
Dhunoi bashkëjetuesen dhe fëmijën e saj të mitur, si dhe i kanosi ata për jetën, arrestohet 45-vjeçari.
Arrestohet dhe babai i 45-vjeçarit, pasi iu gjetën në banesë lëndë plasëse, armë dhe municion.
Menjëherë pas kallëzimit të një shtetaseje, se ajo dhe fëmija i saj i mitur, dhunoheshin dhe kanoseshin për jetën, nga bashkëjetuesi i saj, shërbimet e Komisariatit të Policisë Cërrik, në kuadër të operacionit policor të koduar “Risku”, kanë mundësuar kapjen dhe vënien në pranga të autorit të këtij rasti, shtetasit V. K., 45 vjeç.
Gjatë këtij operacioni është vënë në pranga dhe babai i 45-vjeçarit, shtetasi Z. K., 71 vjeç, pasi nga kontrolli në banesën dhe në automjetin e tij, Policia ka gjetur dhe sekuestruar me cilësinë e provës materiale, 2 kallëpe tritoli, 1 armë zjarri pushkë, 1 armë gjahu, municion luftarak dhe 1 mjet prerës (thikë).
Me qëllim trajtimin e plotë të këtij rasti, kallëzueses dhe fëmijës së saj të mitur iu janë plotësuar kërkesëpaditë për urdhra të mbrojtjes së menjëhershme dhe janë dërguar në qendrën sociale “Forumi i Gruas”, Elbasan, për të marrë asistencën e nevojshme.
Materialet procedurale i kaluan Prokurorisë, për veprime të mëtejshme.
