“Çlirohuni prej plogështisë dekurajuese për të ndalur shpopullimin”, Meta mesazh të rinjve shqiptarë: S’mund të pranojnë duarlidhur fatin që duan të na imponojnë të tjerët

202
Sigal

Presidenti i Republikës Ilir Meta iu ka dërguar një mesazh të rinjve shqiptarë në të gjithë rajonin nga Kosova ku ndodhej në Universitetin AAB. Meta tha se ata duhet të çlirohen prej plogështisë dekurajuese dhe kërkimit të një ardhmërie që i largon nga trojet e tyre për të ndalur shpopullimin e heshtur!

Kreu i Shtetit thekson se shqiptarët nuk mund të pranojnë duarlidhur fatin, që pabesisht duan të na imponojnë të tjerët, gjasme në mënyrë paqësore.

MESAZHI I PRESIDENTIT META

KOSOVA, GJAKU YNË QË NUK FALET KURRË!
Në vigjilje të Ditës së Pavarësisë së Shqipërisë dhe të Flamurit Kombëtar të Ismail Qemalit dhe Isa Boletinit, pata kënaqësinë e madhe të ndaja sot nga Prishtina mesazhin tim me studentët e Kolegjit AAB dhe nëpërmjet tyre me të gjithë të rejat e të rinjtë shqiptarë kudo në rajon, që të çlirohen prej plogështisë dekurajuese dhe kërkimit të një ardhmërie që i largon nga trojet e tyre: PËR TË NDALUR SHPOPULLIMIN E HESHTUR!
Në Shqipëri, në Kosovë dhe kudo në trojet e tyre në rajon, shqiptarët nuk duhet të rrëmbehen prej folklorizmave dhe emocioneve të çastit, por më kryesorja nuk mund të pranojnë duarlidhur fatin, që pabesisht duan të na imponojnë të tjerët, gjasme në mënyrë paqësore.
Vështirësitë dhe kushtet e ndërlikuara nuk duhet të pengojnë, por përkundrazi të frymëzojnë përmbushjen e aspiratave politike, shoqërore, ekonomike dhe kulturore të popullit shqiptar dhe mbarë kombit tonë, për të ndalur sa më parë plagën e madhe të shpopullimit.