Akuzohet se transportonte emigrantë, prangoset 25-vjeçari, në kërkim bashkëpunëtori i tij

35
Sigal

Policia ka arrestuar një 25-vjeçar me iniciale F.H pasi akuzohet se transportonte emigrantë të paligjshëm nga Tirana përmes Kukësit drejt vendeve të Bashkimit Europian.

Ai u kap duke transportuar dy emigrantë me një makinë të cilën e kishte marrë me qira. Policia njofton se është shpallur në kërkim edhe bashkëpunëtori i tij A. B., 19 vjeç.

Ndaj tyre rëndojnë akuzat për veprën penale “Ndihma për kalim të paligjshëm të kufirit”.

Tashmë në lidhje me këtë ngjarje, materialet procedurale i kalojnë Prokurorisë pranë Gjykatës së Shkallës së Parë Tiranë, për veprime të mëtejshme.

Njoftimi i policisë:

Goditet një tjetër rast i veprimtarisë kriminale në fushën e dhënies ndihmë shtetasve të huaj, për kalim të paligjshëm të kufirit, kundrejt fitimit. Arrestohet në flagrancë 1 shtetas, shpallet në kërkim bashkëpunëtori i tij.

Në vijim të goditjeve të njëpasnjëshme të veprimtarisë kriminale në fushën e kontrabandimit të emigrantëve nga vendet e treta drejt vendeve të BE-së, specialistët e Seksionit për Trafiqet, bazuar në informacionet e marra se një 25-vjeçar transportonte me mjet, emigrantë të paligjshëm nga Tirana, me qëllim transportimin e tyre drejt qytetit të Kukësit, me destinacion final vendet e Bashkimit Europian, goditën një tjetër rast, duke vënë në pranga shtetasin : F. H., 25 vjeç, banues në Korçë.

Ky shtetas është kapur nga shërbimet e Policisë, duke transportuar me një mjet të marrë me qira, dy emigrantë të paligjshëm, të cilëve kundrejt shpërblimit iu kishte premtuar kalimin drejt vendeve të BE-së.

Gjithashtu, u bë shpallja në kërkim e shtetasit A. B., 19 vjeç, pasi dyshohet si bashkëpunëtor i shtetasit F. H. në këtë veprimtari kriminale. Materialet procedurale do t’i kalojnë Prokurorisë pranë Gjykatës së Shkallës së Parë Tiranë, për veprën penale “Ndihma për kalim të paligjshëm të kufirit.