Familjarët e 3-vjeçarit, i cili humbi jetën tragjikisht në një kopësht privat në qytetin e Fierit, kanë dalë sot në protestë përpara Prokurorisë, të cilës i kanë kërkuar zbardhjen e plotë të ngjarjes tragjike, ndërsa kanë kërkuar edhe që të takohen me strukturat përkatëse të drejtësisë që po merren me hetimin e saj.
Ata kanë kërkuar që të zbardhet ngjarja se si ka humbur jetën fëmija në kopësht, ndërsa kanë shtuar se ky kopësht ditën e sotme ka qenë i hapur, çka për ata është një vrasje e dytë.
Më tej, familjarët e 3-vjeçarit kanë deklaruar se u kanë thënë se kopshti ka kamera sigurie, që mund të ndihmojnë në zbardhjen e ngjarjes, por kur ata kanë shkuar për ti marrë, u kanë thënë që nuk punonin.
Ngjarja e rëndë ndodhi tre ditë më parë në një prej kopshteve private të qytetit të Fierit, ku fëmija 3-vjeçar ndërroi jetë si pasojë e mbytjes gjatë kohës që ishte në kopësht dhe po kërkonte të merrte çantën.
Nga ekspertiza rezultoi që 3 vjeçari kishte mbërritur i vdekur në spital dhe kishte një shenjë në grykë e cila ishte shkaktuar nga kapuçi i xhupit të tij.
Një ditë pas ngjarjes, policia ka arrestuar edukatoren e kopshtit, Redina Binjaku 27 vjeçare, me akuzën se ishte treguar e pakujdesshme ndërkohë që fëmija i mitur ishte nën përgjegjësinë e saj.
