Policia Kufitare në Kakavijë në bashkëpunim me FRONTEX zbuluan një sasi cigaresh që po transportohej nga Shqipëria në Greqi.
Në vijën e dytë të kontrollit në këtë pikë kufitare, shërbimet policore ndaluan mjetin e shtetasit me inicialet I.A., nga fshati Vrisera i Gjirokastrës.
Ky shtetas, në mjetin e tij, në gomën rezervë kishte fshehur një sasi prej 140 paketash cigaresh. Paketat janë sekuestruar në cilësinë e provës materiale.
Shtetasi I. A. u arrestua në flagrancë, nga specialistët për Hetimin e Krimit Ekonomik e Financiar në DVP Gjirokastër, për veprën penale “Kontrabanda me mallra për të cilat paguhet akcizë”.
Policia Kufitare po vijon me intensitet kontrollet në pikën e kalimit dhe në kufirin e gjelbër, për parandalimin dhe goditjen e paligjshmërisë, si dhe në bashkëpunim me FRONTEX-in, për të parandaluar hyrjen e paligjshme të shtetasve nga vendet e treta.
