Presidenti Ilir Meta ka vlerësuar sot planin ekonomik të kryeministrit Edi Rama për përballimin e emergjencës së koronavirusit.
Përmes një mesazhi në Facebook, Presidenti shprehet se qeveria duhet të përcaktojë sa më parë kriteret e ndihmës për biznesin dhe familjet më në nevojë.
Në lidhje me shkurtimin e pagës së kreut të shtetit, masë të cilën kryeministri tha se nuk e ka ndërmarrë por e ka lënë në gjykimin e kreut të shtetit, Meta shkruan “sa i përket trajtimit financiar të Presidentit të Republikës, ai do të shkurtohet në të njëjtën mënyrë, si dhe për zyrtarët e lartë të shtetit, të parashikuar në planin e bërë publik”.
Mesazhi i plotë i Presidentit Ilir Meta:
“Përshëndes mbështetjen financiare të bërë publike nga Kryeministri.
Ftoj Qeverinë të përcaktojë sa më parë kriteret e ndihmës për biznesin dhe familjet më në nevojë.
Inkurajoj gjithashtu konsultimin me grupet e interesit për të bërë transparente detajimin e fondeve, për t’u dhënë përgjigje të menjëhershme nevojave emergjente të qytetarëve.
Sa i përket trajtimit financiar të Presidentit të Republikës, ai do të shkurtohet në të njëjtën mënyrë, si dhe për zyrtarët e lartë të shtetit, të parashikuar në planin e bërë publik.
Po kështu Institucioni i Presidentit të Republikës është solidarizuar me shkurtimin e fondit të buxhetit vjetor në interes të riadresimit të tyre, në mbështetje të shëndetësisë dhe sektorëve të vijës së parë në këtë përballje me pandeminë globale të COVID 19.
Bashkëpunimi, gjithëpërfshirja, humanizmi dhe solidariteti mbarëkombëtar do të na japë të gjithëve fuqinë e duhur pozitive për ta fituar këtë sfidë, duke mundur frikën, me besimin e palëkundur te e ardhmja dhe në Zot.
