Drejtoria e Inspektimit në Komunën e Prishtinës, e ndihmuar edhe nga policia, ndërmori të martën një aksion në qendër të kryeqytetit, ndaj të gjitha bizneseve që kanë përdorur hapësirat publike dhe nuk kanë paguar detyrimet. Këtyre bizneseve u është bërë edhe konfiskimi i tryezave dhe karrikeve në hapësirat e përdorura, thuhet në një komunikatë për shtyp nga zyra e Komunës. Gjithashtu, shkruhet më tej, askush prej këtyre bizneseve nuk do mund të marrë dot lejen e shfrytëzimit të hapësirës për periudhat në vijim, pa shlyer më parë detyrimet e deritanishme.
