Suplementi Pena Shqiptare/ Fabula nga Ferit Lamaj

1928
Sigal

FSHAT E ZANAT

Murrashi

Kjo ka ngjarë në një fshat,

S’i thonë kot: “fshat e zanat”.

Mu te vila, kryevila,

Kopshti plot me trëndafila,

Zambakë, vjollca, tulipanë,

Borzilokë, jargavanë

Dhe zymbyla anembanë.

Qark e qark një qen murrash

Ruan vilën pash më pash.

Lulet, kopshtin për çdo ditë

I përmjerr a i ujit?

Odat krehur, veshur mirë;

Dyshemeja ndrit pasqyrë.

Por tespihet po dredh plaku:

– Ç’ka që qelb i gjithë konaku?!

S’la ekspert pa sjellë, në botë;

Nga vjen era, s’e gjen dot!

Ia plas fqinji: – Byrazer,

Sa të kesh Murron në derë,

Nuk të shqitet ajo erë…

        Fshat e zanat

– Fshati ynë ka një këndes,

Na bën zgjimin që më pesë!

– Çfarë pese, më mirë hiç!

Fshati ynë ka një kërriç,

Që më tre pëllet kodoshi:

Çohet fshati dhe kaposhi…

      Mos paç hall!

Te Bashkia mos paç hall,

Zyrë më zyrë vjen vërdallë

Porsi rrotë, porsi mole,

Sa dhe breshka të bën qole…

            Njëherë

Njëherë natën te një fushë

Një polic po vidhte rrush.

Roja rojës seç “ia futi”:

– Shpejt, njofto të vijë hajduti!

               Molla

Peshkatari një barrë shkollë,

Ç’i rras grepit fët një mollë.

Burrë i zgjuar, ia pret mendja:

Molla krimbat i kish brenda…

          Takimi

Një çoban, çoban Filani,

Kish takim te Taivani.

Dhentë fët i kyç në stan,

Niset për në Taivan…

    Dhëmbët dhe gjuha

Një qen ujku në katund

I ranë dhëmbët më në fund.

Ç’u shtri gjuha mirë e mirë:

– Tash e tutje jam e lirë…

          Polifonia

Katër korba mbi një degë

Mbanin djathin fort në sqep.

Dhelpra lajkat qet çikrik:

– Pa shih, ç’grup polifonik!

            Fugë

Struci fugë, si shigjetë…

I tha kthesës: – Kthehu drejt!

               Krapi

Rren maçoku: – Flas pa hile,

Kapa krapin plot dhjetë kile!

– Ham, ham, ham! – leh një zagar: –

Pati vallë dëshmitarë?

Daci bishtin “hop” përpjetë:

– Të mos kish, do qe njëzet…

                      Shenja

Mu në barkë dy peshkatarë;

Sot u shkoi peshkimi mbarë.

Ç’i tha njëri shokut tjetër:

– Vër një shenjë, të vijmë dhe nesër!

Tjetri shok pa zhurmë e bujë

Bëri fët një vrimë në ujë…

           Krokodilët

Pranë lumit “ngrin” një rikë.

– Futu, lahu, mos ki frikë! –

I jep zemër keci çil. –

S’shoh gjëkundi krokodilë.

Rika ndien të thartën shije:

– Kec, të qasen si hafije;

Janë nëndetëse, jo anije…