Kafe
Mëngjes apo drekë
te lokali ballas,
kafja 60 lekë,
po sheqeri falas.
Dikush hedh ca llafe:
– Zoti Kamerier,
një filxhan me kafe,
një thes me sheqer!
Gjinkalla
Llap e s’resht me zë të çjerrë,
e ka llapën me ofertë…
Hallexhiu
Dhelpra, Ujku në tryezë;
tok me ta, zoti Këndes,
një kaposh kockë e lëkurë.
Kamerieri, mesoburrë,
një Majmun, qëndis faturë
buzagaz e sigurisht
ia var Gjelit mu në bisht.
– Kush të tha, more Majmun,
se këtu paguaj unë?
– Eh, të njoha, o i shkretë:
një mal halle kam dhe vetë!
Ngrohje globale
Pleksen stinët si rrallëherë:
Vera – Dimër, Dimri – Verë.
Ç’kodosh ngrohje, mor man,
unë po ngrij, jam bërë kallkan!
Dashnori
Ia qan hallin Shoqes njëra:
– Dje Dashnorit, di, ç’i bëra?
Na, ia mblodha, ka si kusht
të mos sillet më si pusht,
ndryshe s’do t’i lë kusurin:
do ta tradhtoj me Burrin!
Në mëdyshje
Majmuneshës, dreq o punë,
pas iu qepën tre Majmunë.
Jo më kot se, paça Krishtin,
që të treve u tundi bishtin.
Me vetveten mollois
në mëtreshje: – Nga t’ia nis?!
Jarani
Fshehur, strukur në dollap,
tërë kujdesje derën hap,
zvarrit këmbët, mos o Zot,
rrasur, ngjeshur në kapotë…
Zgjohet Burri, flet në krizë:
– Kush je ti, që po lëviz?
Fët Jarani me kurriz:
– Nga dollapi sapo dola,
byrazer, jam vetë mola…
Burrëziu
Burrëziu te ballkoni
gjen jaranin, qe Gjitoni,
që po shtirej si i shkretë:
– Ç’bëj këtu, s’e di as vetë!
Burrëqyqi: “Rri i qetë,
çfarë s’ngjet në këtë jetë!
Hyra mbrëmë në tualet,
zë një birbo me kasketë:
– Mos u tremb, – më tha si shok, –
shpoj për naftë, jam gjeolog!”
Dhëmballa
Zonja keq kish një dhëmballë,
te klinika ngjiti shkallë.
Por Dentisti, sikur thonë,
fët e shtriu në poltronë.
Ç’u çudit, po pyet Zonja:
– Pse, kaq thellë të ketë hyrë rrënja?!
Në parfumeri
Majmunesha lyp parfum.
– Do për mbrojtje a për sulm? –
pyet Shitësja kësaj here.
– Unë në fakt luaj portiere!
Eva dhe Adami
Vjen Adami në mesnatë,
i hyn Evës, fësh në shtrat.
Eva zërin në tavan:
– Me kë ishe, donzhuan?
Ky Adami po bën be:
– Në Parajsë rrojmë veç ne!
Lehtë me rrena Eva s’nginjet,
nis t’i numërojë brinjët…
