Veteranë dhe të rinj premtues. Ky është kombinimi që ka zgjedhur Milani për repartin sulmues. Dhe nëse sa u përket veteranëve është i kompletuar me emra si Ibrahimoviç edhe Zhiru, te të rinjtë ka piketuar një futbollist i cili po ndiqet me interes nga klubet më të njohura në Europë.
Sipas mediave italiane, Milani ka zgjedhur talentin serb Mirko Lazetiç për të ardhmen, duke gjetur akordin me klubin e Crvena Zvezdës për transferimin e tij. Sipas TMË, futbollisti i datëlindjes 2004 do të udhëtojë drejt Italisë për të firmosur me Milanin të martën një kontratë që e bën pjesë të tij deri në vitin 2027. Akordi mes klubeve është gjetur për një shifër mes 4 dhe 5 milionë eurove.
Lazetiç është një lojtar të cilin në Serbi e shohin si një sulmues me të ardhme të sigurt në ekipet kombëtare. Që në moshë të re ai ka qenë pjesë e përfaqësueses U19 të këtij vendi dhe golin e tij të parë ndërkombëtar e ka shënuar tre muaj më parë pikërisht në Shqipëri. Lazetiç ishte pjesë e përfaqësueses U19 të Serbisë e cila në tetor 2021 barazoi 2-2 ndaj kuqezinjve të drejtuar nga Armando Cungu në “Elbasan Arena” teksa shënoi golin e rezultatit të përkohshëm 2-0 për ekipin e tij.
