Ishim mësuar që stina e vjeshtës të sillte një gjallëri të veçantë të kampionateve dhe garave sportive. Natyrshëm që bashkë me ato dhe çdo qytetar ta shijonte ndryshe fundjavën. Si pjesë shpirtërore dhe kulturë e njerzëve, sportin nuk e zëvendëson tjetër kush për rolin dhe emocionet që sjell. Por, këtë vjeshtë të 2020-ës, ne shqiptarët, duhet të bëjmë edhe pa sport dhe për pasojë pa një fundjavë ndryshe. Dhe faji nuk është i pandemisë të Covid -19, por për bojktimin thuajse total të bërë nga futbolli dhe të mos zhvillimit të kampionateve në sportet e tjera. E pra, e thënë qartë, sporti është me semafor të kuq, duke mos njohur gara dhe ndeshje as në sportet e luajtura me këmbë, dhe as me në ato të luajtura me dorë. Disa herë e kemi trajtuar këtë temë në shkrimet tona, por siç duket jemi bërë të “bezdishëm” vetëm për ata që e kanë bërë detyrë të bëjën zgjidhjen e duhur dhe jo për lexuesit, tanimë të shumtë që plot kureshtje duan të dinë dhe nga rubrika jonë “Sport” diçka më shumë nga realitet sportit tonë kombëtar. Duke i qëndruar besnik misionit tonë në shërbim të lexuesëve, le të kthehemi tek ky realitet sportiv, që duhet thënë se është sa i pazakontë, por dhe aq shpresëmunguar për një zgjidhje të shpejtë.
“Filloni kampionatin, që të takoheni me kryeministrin”
Kjo është shprehja që ka lënë pas në tavolinë negociatori qeverisë, deputeti Fidel Ylli, pak ditë më parë në takimin me “të pabindurit e futbollit” , anëtarët e Ligës Profesioniste. Dhe përgjigjja që ju kthyen në këtë rast ishte: “bojkotim të fillimit të kampionatit, deri në plotësimin e katër kërkesave. Dikush e mendoi si një dritë jeshile për zgjidhjen e stituatës, kur u tha se do të bëhet një argumentim sqaruar i çdo kërkese, duke sjellë në mënyrë të detajuar atë që kërkohet nga njerëzit e futbollit. Kujt i besohet se ata që kanë në dorë zgjidhjen nuk kuptojnë mirë katër kërkesat e bëra nga Liga Profesioniste e futbollit, kur vetë ata, në mars të 2019, i kishin sygjeruar kryeministrit të premtonte se “futbollistëve do t’ju hiqet tatimi në pagë jo 2 dhe 3 vjet, por për 7 dhe 10 vjet? E pra, ata që luajnë futbollin kërkojnë jo vetëm për vete, por për të gjithë sportistët të mbahet ky premtim. Për të qenë më konkret le të sjellim në vëmendje përsëri ato këtër pika që njerëzit e sportit kërkojnë me këmbëngulje të marrin zgjidhje ligjore. Dhe ato janë: 1.Ndryshimet në ligjin e sponsorizimeve, duke aplikuar sistemin e zbritjes nga tatim fitimi, pasi si funksionon deri më sot ka prodhuar zero sponsor në futboll. 2. Përfshirja e të gjitha veprimtarive ekonomike të klubeve të futbollit në TVSH-në e reduktuar në masë 6%, njësoj si sektorët e bujqësisë e turizmit. 3 .Falja e gjobave e kamat vonesave për detyrimet fiskale të klubeve. 4.Zgjatja e periudhës së përjashtimit nga tatim fitimi mbi të ardhurat personale të futbollistëve nga 2 në 10 vjet. Të qarta të kuptushme janë, por dhe të domosdoshme për sportin në tërësi. Gjithsesi, qoftë Liga Profesioniste, qoftë F,SH,.F –ja , apo specialistët dhe ekspertët që duan t’i mbushin mendjen shtetit dhe qeverisë se zgjidhja mendohet kështu, nuk kanë mundur të bindin qeveritarët për të kthyer një përgjigje zyrtare. Siç duket shprehja “Filloni kampionatin, të takoheni me kryeministrin” është një kusht i panegociushëm nga qeveria, ashtu siç është po i tillë dhe kushti vendosur së fundit nga Liga Profesioniste, ku shprehet se “Bojktimi kampionatit është i panegociueshëm deri në zgjidhjen e kërkuar”. Kështu këto dy qëndrime të kundërta e kanë ndezuar semaforin me sinjal të kuq, për futbollin duke larguar nga fushat e lojës plot 20 mijë futbollistë nga të gjjtha kategoritë dhe nivelet e tij . Tani së fundi mësohet se drejtuesëve të “shtëpisë të futbollit europian”, U.E.F.A nuk ju ka pëlqyer kjo mungësë zgjidhje, ndaj kanë menduar që shumë shpejt të kërkojnë të zhvillojmë bisedime me kryeministrin Rama. Tema është e qartë: “Futbolli kërkon zgjidhje, qeveria të mbajë premtimet”.
“Kampionati” i ndeshjeve miqësore
Edhe pse futbolli ka rreth dy muaj që ju mungon ndeshjeve zyrtare, vetë skuadrat kanë gjetur një zgjidhje tjetër, atë me ndeshje miqësore, për të mbajtur formën sportive të futbollistëve. Kështu gjatë muajit shtator jemi mësuar të dëgjojmë nga kronikat se: “Tirana” 5-1 “Vora” ; “Bylis” 2-1 “Labëria” ; “Egnatia” 2-0 “Lushnja” ; “Partizani” 3-2 “Pogradeci”; “Vllaznia” 0-0 “Teuta”; e kështu rezulate pa fund dhe pa protokoll. Nga një analizë e bërë rezulton se “Bylis” , “Vllaznia”, “Partizani” dhe “Apollonia”, në Kategorinë Superiore dhe “Egnatia” , “Turbina”, “Tomorri” , “Burreli” , “Erzeni” dhe “Korabi” në Kategorinë e Parë si dhe “Vora” , “Labëria”, “Sopoti”, kanë zhvilluar më shumë ndeshje miqësore se të tjerët në këtë periudhë. Aq e vërtëtë është kjo, sa që skuadrat po kthehen për herë të dytë dhe të tretë të njëjtit kundështar. Në preteksin e përgatitjeve për sezonin e ri, si dhe të për të testuar afrimet nga merkato këto ndeshje miqësore po kthehen në një kampionat më vete, në mungesë të kampionateve zyrtare. Me të drejtë, kur shikon gjithë këto ndeshje miqësore, testuese dhe kontrolluese, edhe mund të mendosh se cila nga skuadrat do jetë fituesja e titullit kampion në kampionatin e ndeshjeve miqësore? Le të presim se cili do të jetë fituesi, në kushtet kur nuk duhet se kur dhe kush do të jetë zgjidhja për katër kërkesat që ka paraqitur Liga Profesionste. Ato çka thuhen dhe dëgjohen se “sezoni futbollistik do të fillojë këtë ose atë javë” është një “premtim” i atyre që dinë ti bëjnë mirë këto dhe në mugesë të zgjidhjes. Gjithësesi, “kampionati” ndeshjeve miqësore është duke i zhvilluar, ndeshjet pa një kalendar zyrtar dhe i pandarë në bazë të kategorive që përfaqësojnë.
Sportet me dorë kanë mbetur pa trofe
Basketbolli dhe volejbolli shqiptar janë nga të vetmit dhe më të çuditshmit lloje sporti që sezonin e kaluar e mbyllën pa shpallur fituesit e sezionit. Edhe pse arsyeja ka qenë mungesa e përfundimit të sezonit për shkak të pandemisë të Covid -19, shumë skuadra e kanë kundështuar këtë gjë. Fotografimi sezonit, pikërisht aty ku ndërpre, në ditët e para të muajit mars 2020, nuk ishte zgjidhja e duhur dhe mirëpritur. Skuadrat kryesuese në basketboll dhe volejboll mbetën pa trofe dhe pa titull, duke bërë të gjithë sezonin nul. Një fakt i tillë nuk ka ndodhur asnjëherë në historinë e sporteve të lojrave me dorë. Por një fakt i tillë duket se do të vazhdojë edhe këtë sezon, edhe pse skuadrat kanë mbi një muaj që kanë filluar përgatitjet. Mungojnë ndeshjet dhe garat sportive, sepse Komiteti Teknik i Ministrisë Shëndetësisë nuk po i kthen një përgjigje kërkesave të përsëritura të federatave. Arsyeja se këto lloj sporti zhvillohen në salla të mbyllura nuk është shumë bindëse, sepse tifozët kanë disa vite që nuk ndjekin këto lloje sporti, por dhe për atë, që si baskebolli dhe volejbolli, në vendet europiane, jo vetem që kanë nisur sezonin sportiv, por mendojnë dhe kthimin e tifozëve në pallate dhe salla sportive. Por jo vetëm basketbolli dhe volejbolli por mundja, peshëngritja, pinpongu, e të tjerë, kanë mbetur me sinjal të kuq në “semafor”, në pritje të një zgjidhje të munguar.
