/Gazeta TELEGRAF
Kur ndodhesh në Peshkopi, në kryeqendrën e krahinës fisnike të Dibrës dhe kërkon të mësosh për traditat e mrekullueshme të këtyre njerëzve të mirë dhe shumë punëtorë , natyrshëm flasim edhe për vlerat e tyre në sport. Midis shumë emrave që vijnë që nga viti 1930 , kur është krijuar klubi i futbollit “Bashkimi Dibran” dhe i riorganizuar ndryshe në vitin 1945 me emrin “Korabi”, të gjithë me një zë të thonë:”Maradona” jonë është Shpëtim Toska. Dhe kur vendos përpara fotografitë e shumta të këtij futbollisti që na servirin të apasionuarit e sportit dibran Fehmi Lleshi dhe Fatmir Zhuzhi , bindesh shpejt se ky djalë thuajse në çdo drejtim të pamjes fizike ishte një “fotokopje” e kësaj magjie të futbollit botëror të atyre viteve. Dhe futbollisti dibran Shpëtim Toska në vitet më të mira të karrierës së tij , kishte një trup jo shumë të gjatë dhe muskuloz . Ishte i shpejtë , shumë teknik , por tepër efikas në gjuajtjet me të dy këmbët dhe kokë. Kur ishte në fushën e lojës triblimet ishin pjesë e spektaklit të tij sportiv. Golat e shënuar , janë një “galeri” më vete , që i gjen të fiksuar nga çdo pozicion dhe për çdo stadart. Dhe në karrierën e tij në vitet 1979 deri 1994 sulmuesi Shpëtim Toska ka shënuar 318 gola. Dhe nuk janë pak kaq shumë gola të shënuar nga ai për dy skuadrat ku është aktivizuar me “Korabin” e Peshkopisë dhe “Korabin” e Dibrës së Madhe.
Fati i keq i biografisë së tij bëri që sistemi i kaluar e ndaloi të vezullonte ashtu si duhet, madje dhe me ekipin kombëtar. Që në moshë të vogël , aty tek ajo fusha e vogël pranë xhamisë , në lagjen “Treg” të Peshkopisë , një djalë trup vogël , por tepër i shpejtë dhe i shkathët do harrohej me orë të tëra pas lojës së futbollit. Në moshën 12 vjeçare , në verën e vitit 1972 bën pjesë në ekipin e qytetit të tij për në spartakiadën e pionierëve në Durrës , ku trajnerët e tij të parë Njazi Shehu dhe Xhevdet Tusha do t’i jepnin shansin të përballej me shkodranët Luan Vukatana , Xhabril Gruda dhe partizanasin Genc Tomorri. Kaq ka mjaftuar që në moshën 13 vjeçare të fillojë stërvitjen me ekipin e të rinjve të “ Korabit”. Trajnerët Naxhi Lazimi dhe Niko Delia nuk dëshirojnë t’i japin ngarkesa maksimale dhe e aktivizojnë nga pak minuta. Ndeshja e parë me këtë ekip është në moshën 15 vjeçare , Korabi –Tërbuni. Çfarë shpërthimi djaloshar i Toskës “vogël” që në ndeshjen e parë , kur shpartallon një mbrojtje të tërë dhe shënon plot tre gola. Kaq ka mjaftuar që në fushën e lojës në çdo ndeshje të shpaloset bukur “simfonia” sportive e Shpëtim Toskës. Edhe pse në kategorinë e dytë , pak kush besonte se aty tek ajo fushë sportive e Dibrës mes shtatë maleve, po rritej një talent futbolli .Dhe kur ende nuk ka mbushur 17 vjeç , trajneri i njohur Bexhet Shehu do i besojë fanellën e sulmuesit kryesor , atë me numërin 10 . Dhe ndeshja e parë zyrtare me ekipin e parë në Corovodë , ku përballen “5 Shtatori “ –“Korabi” .
Barazim 1-1 dhe golat mbajnëë firmën e dy sulmuesve me të ardhme, por që nuk i lejoi kush të kapnin nivelet e larta si për skrapalliun Azis Çeçon dhe dibranin Shpëtim Toska .Të dy të gjithë karrierën e kanë në Kategorinë e Dytë, por me shumë dashuri dhe besnikëri ju kanë shërbyen deri në fund qyteteve të tyre. Vitet kalonin dhe Shpëtim Toska vetëm forcohej, rritej dhe bëhej një “tmerr “ i vërtetë për çdo portier. Dhe nuk janë pak, por 280 gola të shënuar me fanellën e “Korabit” të Peshkopisë në harkun e viteve 1979- 1991. Jo vetëm portierët e kategoris dytë , por dhe ata të kategorisë së parë në ato vite janë ndëshkuar nga golat e sulmuesit Toska . Në një ndeshje për kupë midis Korabit dhe Labinotit me dy gola të shënuar nga gjuajtjet stadarte është ndëshkuar dhe portieri elbasanas Bujar Gogunja, që në atë vit mbante dhe rekordin e mos pësimit të golit. Në garën me golshënuesit më të mirë të atyre viteve si : Dali Faruku , Bert Kamberi ,Azis Çeço dhe Albert Haxhia do dilte fitues si përherë Shpëtim Toska. Trajnerët që kanë punuar me të si Bexhet Shehu , Sadri Avdiu, Agim Pira, Rexhep Demneri, Fatbardh Delliallisi, Rexhep Spahiu dhe Refik Resmja , tek ky djalosh kanë konstatuar cilësi të jashtëzakoshme të një sulmuesi , por si “hije e zezë “ i qëndronte biografia.
Në vitin 1986 grumbullohet nga ish trajneri Medin Zhega me ekipin Kombëtar B ku shënon dhe golin e barazimit 1-1 me Kombëtaren A. Por vetëm kaq , sepse dikush e kishte dërguar më parë letrën me biografinë e tij, ndaj “gardhi “ nuk duhej kaluar. Në verën e 1987 trajneri i Dinamos Bejkush Birçe e bën pjesë të Dinamos vetëm për një javë, sepse përsëri ajo “biografia” nuk e lejonte …. Me skuadrën e tij aktivizohej rregullisht përkrah shokëve të tij Ylli Mece , Bujar Sharra , Besnik Armadhi , Mentor Melani, Ramazan Konçi, Avni Hoxha, Kujtim Prençi, Demir Toçi e të tjerë, me të cilët shumë herë e vendosnin “Korabin” e tyre në krye të klasifikim dhe papritmas në dy javët e fundit të kampionatit vjen nga lart “Urdhëri” se në Kategorinë e Parë do të kalonin Traktori , Besa , Tomorri, Luftëtari , Skënderbeu e Besëlidhja ose dikush tjetër, por jo Korabi siç argumentonin “drejtuesit”, sepse duheshin plot 8 orë të udhëtohej nga Tirana në Peshkopi , si ka ndodhur në 1962 , ndaj mendonin se “ Korabi” i dibranëve duhej të qëndronte aty në atë kategori futbolli. Në kujtimet e tij Shpëtim Toska nuk harron përpjekjet për të pasur në çdo kohë materialet e duhura për një futbollist. “Shumë herë takat e këpucëve të sportit i siguroja me anën e kushëririt tim Fastos Bekteshit ish futbollist i Tiranës në ato vite”- kujton Shpëtimi. Por në një ndeshje për Kupë, Korabi –Vllaznia në vitin 1988 ,në një dyluftim me mbrojtësin Dedja , sulmuesi i njohur thyen këmbën duke qëndruar për katër muaj larg futbollit.
Përveç përkujdesjes të mjekut të njohur ortoped Pëllumb Karagjozi , në memorjen e tij ka mbetur dhe sjellja e ekipit shkodran që e vizituan disa herë deri sa ai u rikthue në fushën e lojës .Në vitin 1991 Shpëtim Toska mbyll karrierën si futbollist tek Korabi –Peshkopisë , ku në një ceremoni tepër të veçantë ia dorëzon fanellën me numër 10 sulmuesit të njohur të ekipit tonë kombëtar dibranit Mahir Halili. Por jo vetëm kaq. Për dy vite në 1992-1994 Shpëtim Toska bëhet pjesë e “Korabit” të Dibrës së Madhe, ku aktivizohet si futbollist dhe zv/trajner në ligën e dytë maqedonase. Edhe këtu në dy sezone shënon 38 gola. Në vitet më vonë deri sot që po shkon tek mosha 60 vjeç atë e gjen çdo ditë , pranë ekipeve të futbollit “Korabi” duke ndihmuar me përvojën e tij trajnerët dhe futbollistët. “Me futbollin kam pjesën më të madhe të jetës time dhe pa atë nuk më shkon mirë dita”- mbyll fjalën Shpëtim Toska. Kjo thënie e tij shumë kuptimplote , është dhe epilogu më i mirë i momenteve që ndamë së bashku me ish futbollistin dibran Shpëtim Toska .
Lindur: Në Peshkopi, më 8 shkurt 1960
Karriera si futbollist: 1979 -1991 “Korabi”-Peshkopisë dhe 1992-1994“ Korabi” -Dibrës së Madhe.
Roli në skuadër: Sulmues
Numri fanellës: 10
Gola të shënuar: 318 gola gjithsej, ku 280 gola me Korabin –Peshkopisë dhe 38 gola me “Korabin “ e Dibrës së Madhe .
Vlerësime: ”Mjeshtër Sporti” dhe “Nderi i Qytetit”.