/Gazeta TELEGRAF
Ish futbollisti i njohur Muhedin Targaj , në garderobën e tij personale mban si një vlerë të çmuar dhe tepër të vecantë tre uniforma sportive. E para është uniforma e skuadrës së tij të parë kur nisi futbollin në vitin 1971 “Minatori” të Memaliajt. E dyta fanella më e dashur që i qëndroi besnik dhe shkroi një histori sportive në vitet 1973-1987 ajo e” Dinamos” . Por këtyre nuk mund t’ju qëndrojë e shkëputur fanella e ekipit tonë kombëtar , që siç thotë Mujo ( kështu i flasin shokët dhe tifozët) e ka bërë krenar si futbollist dhe kapiten skuadre në stadiumet evropiane. Të tre këto fanella sportive qëndrojnë aty tërë kohën bashkë në garderobën e tij dhe kanë vazhdmisht kujdesin e bashkëshortes, Irmës. Shpesh herë Mujo Targaj ju bën nga një “vizitë” vlerave të tij ,duke i marrë në dorë e puthur dhe ndihet i kënaqur nga ngjyrat dhe aroma e tyre.-“Këto tre fanella sporti gjithëçka për mua . Ato janë biografia ime sportive e përjetuar në çdo ndeshje. Mua më duket se ato mbajnë ende erën e djersës të trupit tim nëpër vitet e karrierës sportive” ,– thotë me shumë nostalgji Targaj.b Por jo vetëm kaq. Ato tre fanella simbol krijojnë një mjedis të jashtëzakonshëm shpesh herë në festat familjare të familjes Targaj . Fëmijët e të dy vajzave , mbesat e bukura si kukulla dhe nipi i vogël i veshin ato , duke i dhuruar gjyshit të tyre të dashur Muhedinit surprizat më të këndëshme. Dhe këtë gjetje kaq interesante ata pritën t’ia dhurojnë gjyshti të dashur përsëri edhe sot që ai feston 66 vjetorin e lindjes.
Dashuria për futbollin dhe “Minatori” i Memaliajt
Sot këto detaje natyrshëm që e rrisin nostalgjinë dhe bëjën që mosha e kujtimet e kapitenit legjend të lëvizin drejt atyre viteve kur Muhedin Targaj nisi të luajë futboll me shokët e fëmijërisë në rrugicat dhe sheshet e lagjes , atje në qytetin e tij të dashur të Tepelenës. Nuk mund t’i harrojmë , ato ndeshje të bukura futbolli që zhvillonte së bashku me shokët e lagjes dhe qytetit në oborrin e shkollës “Abaz Shehu”, por dhe ato që luheshin në stinën e verës buz lumit Vjosë. Që në ato vite kur ishte ende pa i mbushur 16 vjeç , trajnerët e njohur të futbollit Karafil Asllani dhe Partizan Hila do ta bënin pjesë të skuadrës së tyre të “Minatorit “ të Memaliajt, këtë djalosh shtatlartë që futbollin e dashuronte fortë . Mungesa në ato vite të një ekipi dhe fushe futbolli në Tepelenë, bëri që ky pinjoll i familjes me 7 fëmijë të ekonomistit të nderuar Neki Targaj ta pranojë pa hezitim kërkesën e skuadrës nga Memaliaj. Rugën prej disa kilometra Tepelenë –Memaliaj dhe kthim shpesh herë ai e ka bërë dhe në këmbë, për të mos munguar në asnjë seancë stërvitje dhe ndeshje. Në skuadrën e “Minatorit “ të Memaliajt në vitet 1971-1973 , përveç mbrojtësit Muhedin Targaj do bënin pjesë dhe futbollistët cilësor si Vladimir Shehu ( sot trajner futbolli),Reshat Sala dhe Mehdi Malka ( sot aktor teatri). Skuadra e tyre pjesë Kategorisë dytë ishte një kundërshtare e fortë për skuadrat e Përmetit , Sarandës ,Delvinës, Himarës , Ersekës ,Skraparit, Librazhdit e të tjera ekipe që kanë pranuar dhe humbjen në fushën e lojës. Në çdo ndeshje që zhvillonte në fushën e tij “Minatori” i Memaliajt, grupi i tifozave nga Tepelena të drejtuar nga kryetifozi Ibrahim Selimi do ishin të pranishëm përqark fushës sportive në mbështetje të djaloshit tepelenas Muhedin Targaj . Dhe pas çdo ndeshje që do fitonin , kur ktheheshin ata së bashku me idhullin e tyre do festonin gjatë në rrugët e qytetit të tyre: Tepelenës . Në muajin maj të vitit 1973 , në ndeshjen “Minatori “ Memaliaj me “Shkëndin e “Tiranës, specialisti i njohur i futbollit dinamovit Skënder Jareci ka pikasur si të përzgjedhur të tij, qëndërmbrojtësin e skuadrës vendase Muhedin Targaj. Drejtusit dhe shokët e skuadrës të Memaliajt u ndien keq , që do të largohej nga rradhët e ekipit të tyre ky djalosh i fuqishëm që e vuri talentin , dhe të gjitha energjitë në shërbim të futbollit .
Me “Dinamon” 14 vjet futboll plot vlera dhe suksese
Në verën e vitit 1973 të gjithë shokët e skuadrës dhe tifozët e shumtë i uruan fat dhe suksese Muhedin Targajt tek ekipi i kryeqytetit “Dinamo”. Tek kjo skuadër cilësore për mbrojtësin Muhedin Targaj ,filloi udhëtimi i bukur në botën e bukur të futbollit.Tek “Dinamo “ ai gjeti me të gjitha përmasat e saj përqëndrimin , stërvitjen profesionste dhe disiplinën sportive për çdo ndeshje . Pas një faze përgatitore verore të fortë së bashku me shokët e skuadrës të “Dinamos “ të atyre viteve si portieri Rama , mbrojtësat Mergjyshi,Gjinali , Ibershimi , Sejdini , mesfushorët Ciraku ,Xhafa Hysi ,Ceco , sulmuesin golshënues Pernaska e të tjerë , mbrojtësi 19 vjeçar MuhedinTargaj do të rreshtohej menjëherë në repartin e mbrojtjes . Ndeshja e tij e parë me fanellën blu do të jetë ajo kundër ish 17 “Nëndorit” më 25 gusht 1973 , për Kupën e “Shtypit Popullor “. Dhe skuadra e tij ,” Dinamo “ do fitonte me rezultatin 2-1 , duke i dhënë kështu mbrojtësit të ri motivimin dhe kënaqësitë e para të karrierës sportive. Pas asaj ndeshje trajneri Skënder Jareci do ta përgëzonte fort për debutimin e suksesshëm mbrojtësin premtues Muhedin Targaj. Ndoshta është koicidencë , por në një farë mënyre dhe zgjedhja e tij që ndeshja e parë karierës ka nisur me bardheblutë e Tiranës , por dhe ajo e lamtumirës me futbollin është ndeshja e muajit Maj 1987 “Dinamo” –17 “Nëntori” e fituar nga dinamovitët me rezultatin 4-3. Dhe kështu pas atij fillimi të mbarë nga ndeshja në ndeshje dhe nga sezoni në sezon për 14 vitet që luajti futboll deri në moshën 32 vjeçare Muhedin Targaj i qëndroi besnik vetëm skuadrës së tij të dashur “Dinamos “.
Tre breza me futbollistë ka pritur dhe përcjellë ai si futbollist dhe kapiten në karrierën e tij tek “Dinamo”, duke filluar tek ajo skuadër e vitit 1973 dhe për të vazhduar në vitet më vonë me shokë skuadre Luarasin , Saren, Dautin, Gjonin , Çoçolin, Gegën , Zërin , Ballgjinin , Bregun , Markon , Çobanin , Kuqin , Demollarin, Canaj,Vilën , e shumë e shumë të tjerë që i dhanë emër kësaj skuadre. Dhe së bashku të gjithë janë gëzuar për sukseset dhe arritjet e skuadrës së tyre, ashtu siç nuk janë ndier mirë kur nuk janë realizuar objektivat nga “Dinamo” e tyre e dashur. Në vitet që Muhedin Targaj luajti futboll , të gjitha skuadrat shqiptare pësuan një rritje cilësore në mënyrën etë luajturit dhe synimeve që ato kishin për të fituar trofe. “Partizani”, 17 “Nëndori “ ,”Vllaznia “ , “Flamurtari” ,” Besa “, ‘Labinoti”, por dhe “Lokomitiva” “Apollonia’ “Luftëtari” “Skënderbeu” e të tjerë, sa herë ndodheshin përballë ‘Dinamos “ do të përballeshin me tërë potencialet e tyre sportive për të marrë rezultat pozitiv . Duke kërkuar të bëjë një vlerësim për sulmuesit me të cilët Targaj ka pasur më shumë punë gjatë ndeshjeve , ai tregohet shumë i kujdesshëm dhe e përmbledh gjithëçka në fjalët se : “Në ato vite që unë kam luajtur futboll, tek të gjitha skuadrat ka pasur sulmues që kërkonin vëmendje dhe kujdes”. Trajnerët që kanë punuar me “Dinamon“ në vitet 1973-1987 si Skënder Jareci, Durim Shehu , Saimir Dauti Sabri Peqini , Stavri Lubonja dhe Fatmir Frashëri sa herë që do të duhej të bënin vlerësimin e futbollistëve të tyre , kur vinte rradha për Muhedin Targaj, ata do të rezervonin gjithëmonë fjalët më të mira. Sa i ashpër “ dhe autoritar dukej Targaj në fushën e lojës me kundërshtarin , po aq miqësor do të ishte pas ndeshjes me të gjithë . Pikërisht këtu merr spjegimin e tij dhe fakti, që dhe sot kur kanë kaluar shumë vite që janë larguar nga arena e futbollit të luajtur ata kanë mbetur dhe janë miq dhe familjarë të mirë me njëri –tjetrin . “Sporti i bashkon njerëzit” – thotë Targaj, që shpesh e gjen në shoqëri të ngushtë me tiranas dhe partizanas , vlonjat dhe shkodran , korcar dhe kavajas, fierak e durrsak. Më poshtë kapiteni dinamovit do të shtojë-”Kundërshtarë në fushë , miq të vërtetë në jetë”. Kjo ka qënë si deviz motivuese e brezit tonë që kemi luajtur futboll në ato vite”. Në harkun kohor të viteve 1973 -1987 me ekipin e tij, “Dinamos mbrojtësi dhe kapiteni elegant Muhedin Targaj numëron plot 507 ndeshje për kampionat dhe Kupa . Në vitet 1980 -1987 për plot 7 sezone futbollistike ai ka qënë kapiten i skuadrës “Dinamo “.Një futbollist dhe kapiten me të vërtetë shembullor për të gjithë në fushën e lojës , që nuk është ndëshkuar asnjërë me karton të kuq. Ish gjyqtari i njohur në ato vite Arsen Hoxha thotë” –Kam pasur rastin ta gjykoj në shumë ndeshje të rëndësishme dhe të vështira Dinamon e atyre viteve. Të them të drejtën kapitenin e skuadrës dinamovite Targaj e kam pasur ndihmesë për gjithëçka ..Ai ishte një shembull i vlerësuar për shokët e skuadrës së tij , kundërshtarët dhe për ne gjyqtarët. Edhe pse ishte mbrojtës ai luante futboll të kujdesshëm e të pastër , për të mos e dëmtuar sulmuesin kundërshtar. Një mbrojtës dhe kapiten skuadre të tillë si Muhedin Targaj shumë rrallë i vjen futbollit shqiptar”. Se ishte i tillë në fushën e lojës dhe jashtë saj ndaj me të drejtë dhe sot ky kapiten skuadre, si pak kush tjetër ndihet shumë krenar që me “Dinamon” e tij ka fituar 5 herë titullin kampion kombëtar në sezonet 1974-1975 , 1975-1976, 1976 -1977,1979-1980 dhe 1985-1986 . Është dhe 2 herë fitues i Kupës të Shqipërisë në vitet 1974-1979 . Këtyre trofeve ju bashkohen bukur po 2 herë të tjera , sukseset e “Dinamos “ si fitues i “Medaljeve të Arta” në Spartakiadat Kombëtare të viteve 1974-1979 . Të gjitha këto trofe të fituara , nuk janë pak dhe si askush tjetër për karreirën e futbollistit dhe kapitenit të “Dinamos “, Muhedin Targaj i njohur mirë nga të gjithë si një lab i “butë”, Plot kredo sportive dhe energjik në fushën e lojës , miqësor dhe përgëzues me tifozët e simpatizantët e skuadrës së tij ai do t’i bënte vend respektit në çdo qytet të Shqipërisë , ku shkonte për të luajtur futboll.
Aq i vërtetë është ky fakt , sa që dhe sot e tregojnë në Tepelenë, se në ato vite që luante futboll Targaj me “Dinamon” . Thuajse të gjithë tepelanasit u bënë tifoza të “Dinamos”. Por siç tregojnë tifozat e këtij qyteti nuk janë mjaftur me kaq . Ata shumë herë kanë udhëtuar në ato vite në Gjirokastër,Vlorë , Fier dhe deri në Tiranë për të ndjekur nga afër “Dinamon “ e kapitenit Targaj. Është fakt se ” Dinamo” e viteve 80-të ka luajtur ndeshje të bukura , të ngarkuar me emocionet e futbollit bashkëkohor, jo vetëm në kampionatin shqiptar , por dhe në prezantimet për Kupat e Evropës. Me Targaj në mbrojtje , Markon, Zërin , Demollarin në mesfushë dhe Pernaskën e Ballgjinin në vijën e sulmit,”Dinamo” në vitet 1980 -1986 ka marr pjesë 5 herë në Kupat e Evropës duke u ballafaqur me dinjitet përballë kundërshtarëve të fortë në ndeshjet me “Ajaksin”,” Karl – Zeizz Jena”, “Aberden”, “Harman “-Spartas , “Sprotig”- Lisbon dhe “Beshiktas”. Edhe pse vetëm për sezonin 1985-1986 të Kupës U.E.F.A skuadra e “Dinamos “ ka kaluar në turin e dytë pasi në turin e parë eliminoi maltezët e “Harmanit” në ndeshjet që zhvilloi në fushën e ka njohur humbjen në rezultatin minimal 0-1 edhe pse përball ka pasur skuadra të nivelit të lartë evropian. Për këto ndeshje kapiteni Targaj spjegon:-“ Në këtë periudhë ne si skudër kemi zhvilluar 6 ndeshje për Kupat e Evropës. Por shorti nuk është siç po veprohet në këto vitet e fundit. Atëhere ballafaqoheshe që turin e parë me emër të mëdhenj dhe mundësia eleminimit ishte më e madhe. Gjithsesi unë dua t’i falendoroj shumë të gjithë që në ato ndeshje kemi dhënë maksimumin dhe kemi treguar vlera të futbollit dhe përballë klubeve të mëdha evropiane”. Të gjitha këto, që ndryshe vlerësohen dhe si epoka e një futbollisti dhe kapiteni legjend, i sollën labit Muhedin Targajt shumë keqardhje dhe nostalgji atë ditë të majit 1987 , në ndeshjen “Dinamo” –“Tirana”, kur ai në moshën 32 vjeçare do t’i jepte lamtumirën futbollit të luajtur me skuadrën e tij të dashur. Rikthimi Targaj në vitet 2001-2005 në detyrën e drejtorit teknik tek “Dinamo “ erdhi si një detyrim për t’i shërbyer skuadrës që i dha gjithëçka nga vitet e tij më të mira të jetës dhe mori prej saj emrin e një futbollisti dhe kapiteni të madh e të respektuar .
“Biografia” kuqezi e kapitenit Targaj
Më i plotë dhe tërheqës bëhet portreti i kapitenit –lab të “Dinamos” , mbrojtësit legjend Muhedin Targaj me kontributin që ai ka dhënë me ekipet kombëtare të Shqipëris ë. Dhe gjithëçka ka filluar me ekipin kombëtar të U-21 të Shqipërisë ku ka zhvilluar 7 ndeshje. I veçantë është viti 1981 , ku Targaj së bashku me mikun e tij portierin Perlat Musta edhe pse ishin mbi moshë janë pjesë e skuadrës të trajnerit Shyqyri Rreli që është shpallur për herë të dytë në historinë e saj Kampione Ballkani. Finalet e këtij kampionati Ballkanik janë zhvilluar në Vollos të Greqisë. Në ndeshjen me Rumaninë kuqezinjtë 21 vjeçarë fituan me rezultatin 4-1 . Në finale janë përballë Bullgarisë ,që kishte ardhur me një grup lojtarësh të cilët pas një viti të gjithë ishin në Kombëtaren e Bullgarisë. Shqipëria fiton 3-1 me gola të shënuar nga Roland Luci , Hasan Lika dhe Muhedin Targaj duke u shpallur me meriët fitues të Kampionatit Ballkanik për ekipet U-21 .Gjithsesi këto ndeshje me kombëtaren e U-21 janë thjeshtë një “nxemje” për mbrojtësin dhe kapitenin Muhedin Targaj që në harkun e viteve 1980-1985 do zhvillonte 22 ndeshje me ekipin kombëtar dhe do të shënojë 3 gola me gjuajtjet e sakta nga pika e penalltisë në ndeshjet kundër Filandës në 2.9.1981 , kundër R.F.GJ. në 30.3.1983 dhe Austrisë më 8.6.1983 .E ka veshur për herë të parë fanellën kuqezi të ekipit kombëtar si mbrojtës i majtë në 3 shtator1980 në atë ndeshje të fituar 2-0 përballë Finlandës dhe e ka mbyllur aventurën kuqezi më 30 tetor 1985 në ndeshjen Shqipëri –Greqi , ku dhe barazimi 1-1 kënaqi ambicjen sportive të këtij kapiteni të shumë ndeshjeve të ekipit tonë kombëtar. Por në memorjen e tij dhe sot vijnë ndeshjet e vështira, por të bukura si ato ndaj R.F.GJ .Turqisë , Greqisë , Austrisë , Polonisë dhe Belgjikës . E si mos ta kujtojmë sot , kapitenin Targaj dhe shokët e skuadrës atë fitore 2-0 ndaj Belgjikës më 22 dhjetor 1984 , në stadiumin “Qemal Stafa “, kur gjithëçka në Shqipëri mori ngjyrat e bukura kuqezi . Këto ndeshje të paharrura , si dhe shumë të tjera si ato , i kanë dhënë Muhedin Targaj një vend të merituar në podiumin e artë të futbollit shqiptar.
Skeda e Muhedin Targaj
Lindur : Në Tepelenë më 17 mars 1955
Karriera si futbollist: Në vitet 1971-1973 “Minatori” – Memaliaj, me 32 ndeshje të zhvilluara, në vitet 1973-1987 “Dinamo”-Tiranë, 507 ndeshje të zhvilluara. 1978- 1981 me ekipin kombëtar U-21 me 7 ndeshje të zhvilluara dhe 1 gol i shënuar dhe 1980-1985 me ekipin kombëtar të Shqipërisë me 22 ndeshje të zhvilluara dhe 3 gola të shënuar.
Roli në skuadër: Mbrojtës krahu dhe qendërmbrotjës si dhe kapiten skuadre për 7 vite tek “Dinamo” për 5 vite tek ekipi kombëtar i Shqipërisë .
Trofe të fituara: 5 herë fitues i titullit kampion kombëtar me “Dinamon” në sezonet 1974-1975 , 1975-1976, 1976 -1977,1979-1980 dhe 1985-1986. 2 herë fitues i Kupës të Shqipërisë në vitet 1974-1979 dhe po 2 herë fitues i Medaljeve të Arta në Spartakiada Kombëtare të viteve 1974-1979 . Kampion Ballkani në vitin 1981 me ekipin kombëtar U-21 të Shqipërisë .
Detyra të kryera në shërbim të futbollit: Në vitet 2001-2005 është Drejtor Teknik i “Dinamos” dhe vitet 2001-2017 për katër mandante rresht është antar i Komitetit Ekzekutiv të F.SH.F-së.
Vlerësime për karrierën: Fitues 6 herë i anketës “Sportisti më i mirë i klubit “Dinamo” , fitues 2 herë i anketave kombëtare “10 sportistët më të mirë të vitit”, “Mjeshtër i Merituar Sporti”, “Nderi i Futbollit Shqiptar”, “Legjenda e Futbollit “ . “Mjeshtër i Madh” dhe “Qytetar Nderi” për qytetet Memaliaj dhe Tepelenë.