Mbrojtësi i kombëtares shqiptare zgjidhi me konsensus kontratën që e lidhte me klubin gjerman deri në verën e vitit 2019-të dhe tani është një lojtar i lirë në treg dhe mund të firmosë me skuadrën që dëshiron.
Pas shumë kontradiktash me Hamburgun që e nxorri jashtë skuadre Mavrajn që nga marsi i kaluar 32-vjeçari arriti akordin për t’u shkëputur nga klubi që këtë sezon për herë të parë në historinë e tij do të luajë në Bundesligën e 2-të.
Drejtuesit e Hamburgut vendosën ta lejonin mbrojtësin shqiptar të largohej një vit më herët nga sa parashikohej në kontratë sepse paga prej rreth 2 milionë eurosh në sezon e Mavrajt peshonte shumë në arkat e Hamburgut.
Hamburgu në komunikatën për shtyp ku njofton prishjen e kontratës e falenderon Mavrajn për kontributin e dhënë dhe i uron suksese për të ardhmen. Tashmë Mavraj mund të shqyrtojë me imtësi ofertat dhe mund të vendosë për të ardhmen.
Për Mavrajn interesohen disa klube turke por edhe Palermo në Serinë B e Deportivo La Coruna në Spanjë që këtë sezon do të luajë në Segunda Division.
