Zgjedhjet: Hapja e kutive do sanksionohet me ligj

277
Sigal

Në marrëveshjen e 5 qershorit me ndërmjetësimin e ndërkombëtarëve dhe pas shqetësimeve të ngritura nga PD për shitblerjen e votës, PS ka rënë dakord për hapjen e kutive dhe llogaridhënie të administratës zgjedhore.

Me ndryshimet në Kodin e ri Elektoral, partitë politike kanë të drejtën për t’u pajisur me kopje ose për të këqyrur dokumentacionin zgjedhor dhe atë policor, përpara afateve të përcaktuara për zhvillimin e procedurave ankimore.

Gjithashtu pritet të sanksionohet me ligj edhe hapja e kutive dhe marrja e provave, i cili mund të kryhet me kërkesë të një anëtari të Komisionit të Ankimimeve dhe Sanksioneve në KQZ gjatë procesit të ankimimit.

Gjithashtu rishikimi i mëpasëm i fletëve të votimit dhe e materialit zgjedhor lejohet të bëhet vetëm pasi të jetë shpallur rezultati përfundimtar, të jenë përmbyllur procedurat ankimore dhe zgjedhjet të kenë përfunduar.

Këqyrja bëhet nga KQZ-ja, me përzgjedhje rastësore, ose me kërkesë të palëve të interesuara, me përcaktim.

Pavarësisht së kush ka marrë nismën për këqyrjen, procesi realizohet nga personeli i KQZ-së në seancë publike, në të cilën ftohen të marrin pjesë kërkuesi dhe përfaqësuesit e partive parlamentare në KQZ.

Procesi videoregjistrohet dhe videoregjistrimi ruhet në arkivin e KQZ-së. Për një periudhë tranzitore deri në formimin e plotë të Gjykatës Administrative të Apelit, shkalla gjyqësore e ankimimit ndaj vendimeve të KAS-it kryhet në Kolegjin Zgjedhor.

Në short përfshihen të gjithë gjyqtarët e apelit por edhe të shkallës së parë të cilët e kanë kaluar me sukses procesin e vetingut në momentin e hedhjes së shortit.