Nga Erisa Xhixho/
Kjo qeveri që nuk siguron dot ilaçe dhe mjekim për qytetarët, premton trajtime të sëmundjeve të komplikuara. Si mund t’i besohet kësaj qeverie kur:
Në Spitalin e Traumës, sallat e kirurgjisë vazhdojnë të jenë jashtë funksionit për shkak të rikonstruksionit, ndërsa mijëra pacientë mbeten në pritje dhe urgjencat përballen me një sistem të paralizuar.Në Neurologji nuk funksionon angiografia cerebrale, duke i detyruar qytetarët të paguajnë mijëra euro te privati.Në Onkologjik mungon Avastina, ndërsa pacientët me kancer detyrohen ta blejnë në tregun e zi me çmime marramendëse. Edhe pajisjet jetike, si Akseleratori Linear 3, dalin jashtë funksionit pak javë pasi janë vënë në përdorim.Ky nuk është thjesht dështim. Kjo është braktisje e qytetarëve nga një qeveri që propagandon “shëndetësinë falas”, ndërsa shqiptarët paguajnë dy herë: me taksat e tyre dhe me jetën e tyre.
Sot ka familje që lypin donacione për të shpëtuar një fëmijë apo një të afërm sepse shërbimi shëndetësor nuk i mbulon.Shëndetësia nuk është luks dhe as privilegj. Është një e drejtë themelore, të cilën kjo qeveri e ka kthyer në mall që blihet vetëm nga ata që kanë mundësi ta paguajnë.
