Greqia tashmë ndodhet përballë faktit të kryer. Pas vizitës zyrtare të kryediplomatit grek Niko Dendias në Tiranë, rënies dakord për t’u përballur në Hagë sa i përket përplasjet për ndarjen e ujërave të territoriale mes dy vendeve, Greqia ka bërë të ditur se Dekreti presidencial për zgjerimin në Jon nga 6 në 12 milje është miratuar, pasi u paraqit në Gjykatën e Kasacionit (të Shtetit) nënshkruar nga Kryeministri dhe anëtarët e Këshillit të Ministrave. Deri më tani Tirana zyrtare nuk ka dhënë ndonjë reagim zyrtar për këtë lajm të bujshëm. Vladimir Beja, ish- Komandanti i Forcave Ushtarake Detare të Republikës së Shqipërisë dhe ish-kryetari i grupit të ekspertëve në Marrëveshjen me Italinë, ka ngritur alarmin, se një gjë e tillë, do të ketë pasoja dhe propozon një hartimin e një strategjie kombëtare.
Reagimi i Vladimir Beja
Deklarata e kryeministrit aktual grek Mitsotakis se Greqia do t’i zgjerojë Detin Territorial nga 6 në 12 milje në Detin Jon, jo vetëm ngjalli shqetësim, por u vlerësua e nxituar dhe e njëanshme si nga Sekretari i Përgjithshëm i OKB, ashtu dhe nga samiti i BE-së! Greqia me ligjin e saj të Kufirit, qysh nga viti 1936, gëzon Det territorial deri në 6 milje! Ajo ka tentuar disa herë ta ndryshojë këtë ligj, por nuk është lejuar, si nga SHBA ashtu dhe vendet e tjera, sidomos fqinjët e saj! Konventa ndërkombëtare e Montego Bay, apo Ligji Ndërkombëtar i Detit, siç njihet Sot, u njeh të drejtën shteteve bregdetare t’i kenë ujërat territoriale deri në 12 milje, por në kushtet e një shteti si Greqia me mijëra ishuj, e sheh të pamundur, të padrejtë që ishujt të gëzojnë statusin e njëjtë me Kontinentin! Pretendimi Greqisë për zgjerim të Detit Territorial në veri të Ishujve Erikusa dhe Fanosit (Othonoi) është arrogant si përgjigje ndaj palës shqiptare për mos nënshkrim të Marrëveshjes- projekt dhe se ku zgjerim nga 6-12 milje, cenon-pre–hapësirën e Detit Territorial të RSH dhe Zonat ekonomike ekskluzive, që sipas Ligjit Ndërkombëtarë të Detit i përkasin, i takojnë Shtetit Shqiptar! Përpjekjet e dështuara për mosarritjen e Marrëveshjes me Greqinë, mund të trajtohen dhe si rezistencë serioze e ekspertëve tanë, jo qeveritare, apo jo nëpunës të Shtetit, të cilët duhen vlerësuar kombëtarisht për kontributin e tyre! Mbi bazën e qëndrimeve të tyre shteti shqiptar duhet të ndërtojë një draft- marrëveshje si strategji kombëtare dhe jo më, të PD-së dhe të PS-së dhe këtë draft ta paraqesë aty ku duhet, qoftë dhe në Gjykatën Ndërkombëtare të Hamburgut! Shqipëria duhet të tërhiqet nga premtimi i qeverisë Rama për të shkuar me një draft të përbashkët me Greqinë në Gjykatë Ndërkombëtare! Ne duhet të kemi Draftin tonë, siç u shpreha më lart një Draft Kombëtar! Dhe jo në Gjykatën e Hagës, por të Gjykata e Hamburgut, e cila është ngritur posaçërisht për të gjykuar mosmarrëveshjet, në zbatim të parimeve të Konventës së Montego Bay!