Rama fton arkitektë e planifikues urbanë me famë botërore për “Shqipëria e Gjeneratës Tjetër”

475
Sigal

Kryeministri i ri  ngre grupin e punës që do merret me prishjen e godinave pa leje në Bregdet

Kryeministri i zgjedhur, Edi Rama ka angazhuar një skuadër profesionistësh për planifikimin urban. Në një postim në rrjetin social, Rama njofton se, arkitektët e planifikuesit urban po zhvillojnë një vizitë studimore 2-ditore në Tiranë dhe jashtë saj. Nisur nga sot, në hotel “Sheraton” do të zhvillohet konferenca “Shqipëria e Gjeneratës Tjetër”, që do t’i kushtohet territorit dhe ekonomisë. “Një Konferencë për territorin dhe ekonominë; Një hapësirë diskutimi me arkitektë, urbanistë, artistë dhe ekonomistë, financierë, menaxherë, ku do të ballafaqojmë ide, do të marrim opinione, sugjerime. Do të vendosim një kontakt që synon të jetë i vazhdueshëm në funksion të një transformimi rrënjësor të atyre potencialeve të mëdha që Shqipëria i ka si dhuratë, nga Zoti apo nga natyra, por që në gjithë këto vite janë dëmtuar në mënyrë shumë të ndjeshme dhe kërcënuese për të ardhmen. Padyshim, një nga prioritetet e vitit të parë do të jetë goditja pa asnjë kompromis ndaj gjithë atyre zhvillimeve që kanë dëmtuar territorin duke filluar nga bregdeti. Por, njëkohësisht, edhe nisja e punës intensive për një zhvillim harmonik, të qëndrueshëm, ekonomik, social dhe urban në funksion të një turizmi, i cili nuk mund të bazohet më në shifra të sajuara, apo duke u ngushëlluar me prurjet që vijnë natyrshëm drejt bregut, por që duhet të kthehet në një industri për të prodhuar punësim dhe të mira materiale”.

Konkretizimi i ideve të Ramës

Iniciativa politike e Kryeministrit Rama, për të prishur çdo ndërtim pa leje në Bregdet, e cila filloi me vënien në punë të strukturave të bashkive dhe komunave të bregdetit, në të cilat të zgjedhurit janë të PS-së, nuk do të mbetet vetëm një fushatë politike. Sikurse bëjnë me dije, burime të mirinformuara në PS, kryeministri Rama ka ngritur një grup pune që po merret me kryerjen e një studimi të thellë rreth problematikës së krijuar si pasojë e ndërtimeve pa asnjë kriter, veçanërisht për ato që janë ndërtuar në zonat bregdetare ,ku edhe ndërhyrja do të jetë më e shpejtë. Në zonat bregdetare pritet që ndërhyrja të jetë edhe më drastike, për shkak të numrit tepër të lartë të ndërtimeve në këtë zonë dhe emergjencës si pasojë e sezonit të ardhshëm turistik.

Për herë të parë pranë Kryeministrisë, Autoriteti Kombëtar për Bregdetin

Sikurse ishte zotuar edhe në fushatën elektorale, Kryeministri Edi Rama ka ngritur pranë kryeministrisë edhe Autoritetin Kombëtar për Bregdetin, ku sipas burimeve të mirinformuara të “Telegraf”, Edi Rama do të emërojë një nga bashkëpunëtorët e tij më të besuar, Auron Tare. Subjekti i AKB-së, do të jetë pikërisht  zhvillimi dhe perspektiva  e Bregdetit. Mësohet se, eksperti  Artan Lame po merret me studimin dhe planifikimin e territorit, ndërsa Auron Tare me gjetjen e rrugëve për zbatimin e projektit për “rikthimin në identitet” të hapësirave të zëna gjatë këtyre viteve nga ndërtimet pa leje, veçanërisht në gjashtë mujorin e fundit ku thuajse të gjitha institucionet shtetërore kanë qenë të angazhuara për fushatë. Pjesë e grupeve të punës janë edhe mjaft arkitektë, inxhinierë dhe ekonomistë të cilët, po studiojnë ndërhyrjet dhe po llogarisin koston e këtyre ndërhyrjeve. Ka qenë vetë Artan Lame, i cili në fillim të muajit gusht, në një dalje për mediat nga selia e Partisë Socialiste, paralajmëroi se kryeministri i ri Rama në shtator do të paraqesë paketën e emergjencës kombëtare për territorin. Lame ka përsëritur premtimin për legalizimin falas të banesave, por ka shtuar se do të merren masa dhe do të zhbëhet çdo vendim për legalizime në zonat e mbrojtura mjedisore, parqe kombëtare, arkeologjike, turistike e në plazhe. Nga PS-ja shprehen se nuk do të legalizohet asgjë e kundërligjshme në vijë bregdetare dhe asgjë e ndërtuar për qëllime fitime kudo qoftë. Sipas tyre, ashpërsia e ligjit pritet që të bjerë mbi pronarët e këtyre ndërtimeve , duke paralajmëruar se do të ketë penalizime për ata që masakrojnë bregun dhe ata që kanë bërë legalizime në zonat e mbrojtura mjedisore, arkeologjike, gjatë rrugëve kombëtare dhe nyjet kryesore rrugore, turistike, plazheve etj. Aktualisht, grupet e punës po mbledhim informacion për ndërtime në Dajt, Butrin, Kala Krujës, Bregdetin Vlorë-Orikum dhe në zonat historike të Lezhës. Aktualisht, vetëm në nismën e publikuar nga PS , janë 379 (foto dhe video) denoncime. Pjesa më e madhe tregojnë për objekte të ndërtuara në zonat bregdetare, kryesisht në Vlorë dhe në Sarandë. Menjëherë pas tyre vjen ehe kryeqyteti, për të cilin denoncimet më së shumti kanë të bëjnë për shtesa pallatesh. Denoncimet nuk mungojnë as nga qytetet e vegjël si Gramshi, Librazhdi apo Kruja. I gjithë procesi i denoncimeve po ndiqet nga një grup pune në Partinë Socialiste, që do të ndërtojë më pas edhe një plan për hetimin e lejeve ndërtimore.

 Rama, redaktorë të gjuhës shqipe nëpër institucione

 Duke e vlerësuar se deri tani gjuha e përdorur në shkresat shtetërore ka qenë një deformim i shqipes letrare, Kryeministri Rama ka kërkuar që çdo institucion shtetëror të asistohet në formulimin e shkresave nga redaktorë të gjuhës shqipe. Bëhet e ditur se kreu i ri i qeverisë është angazhuar t’i ndryshojë paraqitjen shtetit shqiptar edhe në shkresat zyrtare që e përfaqësojnë atë. Kryeministri i zgjedhur ka kërkuar përgatitjen e një konkursi për 24 redaktorë të gjuhës shqipe. Mësohet se, në Kryeministri dhe në çdo ministri do të vendoset nga një redaktor për të siguruar seriozitetin e gjuhës zyrtare dhe për t’i dhënë fund masakrës së shkresave të shtetit shqiptar. Ndërsa, një ekip prej tre redaktorësh do të shërbejnë si njësi kontrolli e gjuhës së shkruar shqipe, në çdo dikaster dhe agjenci. Rama ka kërkuar vendosjen e gjobave për shpërdorim letre dhe kohe për hartuesit e dokumentacionit, që bëjnë gabime drejtshkrimore në shkresat zyrtare. Duke e theksuar shpesh se shteti ynë duhet të jetë i vetmi shtet në Europë, ku ka një kaos të vërtetë në paraqitjen dhe në shkrimin e gjuhës, Rama beson se, duhet një paraqitje dinjitoze për një shtet edhe në këtë element për t’i dhënë fund njëherë e përgjithmonë gjendjes së rëndë të materialeve gjuhësore të dokumentacionit zyrtar.

Qeveria ‘Rama’ do të zhbëjë koncesionet e gabuara të paraardhësit

PS-ja denoncoi, atë që ajo e quan vjedhje të aseteve publike nga qeveria në ikje e kryeministrit Berisha. Deputetja socialiste Ermonela Felaj, nga selia e improvizuar e Kryeministrit të ardhshëm, denoncoi shpalljen tenderit nga agjencia e prokurimeve publike për të dhënë me koncesion në portin e Durrësit. “Edhe pse përmes një vote plebishitare shqiptarët zgjodhën ndryshimin në zgjedhjet e 23 Qershorit, qeveria në ikje ende vazhdon të ndërmarrë vendime, të cilat bien ndesh me interesin publik dhe në të njëjtën kohë nuk plotësojnë vullnetin e popullit, që u shpreh përmes votës. Jo më larg se në datën 19 gusht, Agjencia e Prokurimeve Publike ka shpallur fituesin e tenderit për dhënien me koncesion të Portit të Durrësit. Një tjetër tender, një tjetër koncesion, një tjetër plaçkitje e aseteve publike. Dhe mbi të gjitha, një proces aspak transparent, i nisur vetëm 3 ditë përpara datës së zgjedhjeve dhe i përfunduar pasi shqiptarët e kishin shprehur vullnetin e tyre për të dërguar qeverinë Berisha në opozitë”,deklaroi ajo. Sipas Felaj, mungesa e plotë e transparencës bën që S-ja ta vlerësojë këtë tender një procedurë të pastër elektorale dhe të papranueshme nga ana e tyre. “Mungesa e plotë e transparencës, por edhe periudha kohore kur ky proces u zhvillua, na bën të mendojmë se ky tender është një procedurë e pastër elektorale, e cila për ne është e papranueshme. Njësoj siç është e papranueshme vala e koncesioneve dhe privatizimeve të gabuara, në dëm të interesit publik, karakteristikë e 8 viteve qeverisje të Sali Berishës dhe një nga arsyet pse shqiptarët votuan në mënyrë plebishitare kundër tij”, -tha Ermonela Felaj. Duke paralajmëruar se qeveria e majtë do ta zhbëjë këtë vendim që në mbledhjen e saj të parë, ajo i bëri thirrje Prokurorisë të nisë hetimet për vjedhjen e këtij aseti publik. “Ky vendim do të jetë një prej atyre vendimeve që do të zhbëhet nga qeveria e re qysh në mbledhjet e para të qeverisë. Por në të njëjtën kohë, dëshirojmë t’i bëjmë thirrje organit të prokurorisë për të nisur çështjen dhe hetimet për grabitje të pronës publike. Për ne pasuria kombëtare është aseti më i çmuar, që në asnjë rast e për asnjë arsye nuk mund të shpërdorohet në këtë formë”, përfundoi Felaj. Këshilli i Ministrave ka miratuar dhënien me koncesion të një hapësire pranë Urës së Dajlanit në Durrës, ku parashikohet të ndërtohet një port jahtesh. Në dokumentin e publikuar në Fletoren Zyrtare, qeveria ngarkon Ministrinë e Punëve Publike dhe Transportit për zbatimin e këtij vendimi. Dokumenti qeveritar përcakton gjithashtu se koncesioni do të jetë i formës BOT, ndërtim, shfrytëzim dhe transferim në pronësi të shtetit. Porti do të jetë ngjitur portit të madh dhe në afërsi të kryqëzimit të rrugëve kryesore të vendit.